Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 673 Hüküm no: 476 Orijinal metin no: [112a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in, kocası merhum Abdullah Bey’in zimmetindeki mehrini vasî Hüseyin Efendi’den talep ettiği Mahmiye-i Galata muzâfâtından kasaba-i Tophâne mahallâtından Mustafa Ağa mahallesinde sâkin iken bundan akdem vefât eden Abdullah Bey b. Abdullah nâm kimesnenin verâseti zevce-i metrûkesi Âişe bt. Mehmed ile müteveffâ-yı mezbûrun firâşından hâsıl mezbûre Âişe batnında mevcûd olan hamline münhasıra olduğu şer‘an zâhir ve müte‘ayyin oldukdan sonra işbu bâ‘isetüˈl-kitâb mezbûre Âişe meclis-i şer‘de haml-i mezkûrun kıbel-i şer‘den mansûb vasîsi olup tereke-i müteveffâ-yı mezbûre vâzi‘uˈl-yed olan Hüseyin Efendi b. İsmail mahzarında üzerine da‘vâ ve takrîr-i kelâm edip zevcem müteveffâ-yı mezbûrun zimmetinde ma‘kūdun-aleyh olan yedi bin râyic fiˈl-vakt akçe mehr-i müeccelimi mezbûrdan kableˈl-istifâ fevt olmağla hâlâ meblağ-ı mezbûru muhallefâtına vâzi‘uˈl-yed olan vasî-i mezbûr Hüseyin Efendiˈden taleb ederim suâl olunsun dedikde gıbbeˈs-suâl ve akībeˈl-inkâr müdde‘î-i mezbûreden müdde‘âsına mübeyyine [beyyine] taleb olundukda udûl-ı Müslimînˈden olup mahalle-i mezbûre sâkinlerinden Ahmed Çelebi b. Hasan ve Mustafa Çelebi b. Mansur nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-vâki‘ müteveffâ-yı mezbûr Abdullah Bey müdde‘î-i mezbûreyi yedi bin akçe râyic fiˈl-vakt akçeye bizim huzûrumuzda tezevvüc ol dahi nefsine tezvîc eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinden sonra müdde‘iyye-i mezbûre Âişe ba‘deˈt-tahlîf mûcebiyle ba‘deˈl-hükm mâ hüveˈl-vâki‘ biˈt-taleb ketb olundu. Hurrire fiˈl-yevmiˈs-sânî min-Saferiˈl-hayr li-sene hamse ve semânîn ve elf. Şuhûdüˈl-hâl: Mustafa Çelebi b. Mansur, Ahmed Çelebi b. Hasan, Mehmed Çelebi b. Derviş, Hüseyin Çelebi b. Ali