Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 674 Hüküm no: 477 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevelli Mehmed Bey’in, Gülistan, Fatma ve Rabia’nın, merhum Kilarcıbaşı Ahmed Efendi Vakfı’na olan borçlarını talep ettiği Mahmiye-i Galata Sarayıˈnda vâki‘ merhûm Kilarcıbaşı Ahmed Efendiˈnin nükūd-ı mevkūfesine hâlâ mütevellî olan bâ‘isüˈr-rakīm Mehmed Bey b. Mustafa meclis-i şer‘de mahmiye-i mezbûre muzâfâtından kasaba-i Tophâneˈde Kuloğlu mahallesinde sâkine Receb Beyˈin odalığı demekle meşhûre Gülistan bt. Abdullah ve el-Hâc Hüseyin zevcesi Râbia bt. Abdülmennan ve Solak Ahmed Bey zevcesi Fatma bt. Abdullah nâm hatunlar mahzarlarında üzerlerine da‘vâ ve takrîr-i kelâm edip mukaddemâ vakf-ı mezbûra mütevellî olup vefât eden Mehmed Efendi b. Ali yedinden zamân-ı tevliyetinde mal-ı vakıfdan mezbûre Gülistan elli beş esedî guruş ve merkūme Fatma yüz esedî guruş ve mezkûre Râbia yirmi esedî guruş alıp her biri deyinlerini edâ etmeden mezbûr Mehmed Efendi fevt olup verâseti zevce-i metrûkesi Hadîce nâm hatun ile kebîr oğlu Abdullah ve sagīr oğlu Abdüllatifˈe münhasıra olmağla ben dahi cem‘an meblağ-ı mezbûr yetmiş esedî guruşu mezbûrlardan biˈt-tevliye taleb eylediğimde mezbûrân Abdullah Çelebi ve Hadîce sagīr-i mezbûrun vasîsi Ali Efendi nâm kimesne cümlemiz bir meclisinde olduğumuz hâlde huzûr-ı hâkimüˈş-şer‘de meblağ-ı mezbûr yüz yetmiş esedî guruşu mezkûrlardan bana havâle-i sahîha-i şer‘iye ile havâle ettiklerinde anlar dahi bana edâya ta‘ahhüd ve ikrâr ve ben dahi havâle-i mezkûru kabûl etmekle hâlâ meblağ-ı mezbûr yüz yetmiş beş esedî guruşu mezkûrlardan taleb ederim suâl olunsun dedikde gıbbeˈs-suâl mezbûrât Gülistan ve Fatma ve Râbia cevâblarında kazıyye bâlâda tahrîr olunduğu vech üzere olduğunu her biri i‘tirâf etmeğin mûcebiyle ba‘deˈl-hükm mâ vaka‘a-i biˈt-taleb ketb olundu. Fiˈl-âşir min-Muharremiˈl-harâm sene 1085. Şuhûdüˈl-hâl: İbrahim Ağa b. Hızır, Ahmed Efendi b. Hızır, Ali Ağa b. Hızır, Mehmed Çelebi b. Ali, Ahmed Çelebi b. Mehmed, Molla İbrahim.