Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 675 Hüküm no: 478 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peksimedci Hasan Beşe’nin, merhum Kaymak Mehmed Kapudan’ın zimmetindeki peksimed bahasından alacağını varislerinden talep ettiği Peksimedci tâifesinden işbu râfi‘üˈl-vesîka Hasan Beşe b. Muhib meclis-i şer‘de mahmiye-i Galata hâricinde Şahkulu mahallesinde sâkine iken bundan akdem vefât eden Kaymak Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmed ile anası Hadîce bt. Hasan nâm hatunlar taraflarından vekîl-i müseccel olan Ramazan Çelebi b. Yusuf mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde yedimden müşterâ ve makbûz kantarı beynimizde ilm-i şer‘î ile peksimed bahâsından yüz elli esedî guruş hakkım olup meblağ-ı mezbûru kableˈl-istifâ fevt olmağla hâlâ terekesine vâzi‘atüˈl-yed olan mezbûrâtdan taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînˈden Hasan Efendi b. Abdülgaffar ve Nalçacı Hüseyin Beşe b. Yusuf nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında müdde‘î-i merkūm Hasan Beşeˈye peksimed semeninden yüz elli esedî guruş zimmetimde deynimdir deyü huzûrumuzda ikrâr ve takrir bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîfiˈl-mu‘teber mûcebiyle hüküm birle mâ vaka‘a biˈt-taleb ketb olundu. Fiˈs-sâbi‘ min-Saferiˈl-hayr li-sene hamse ve semânîn ve elf. Şuhûdüˈl-hâl: İsmail Ağa b. Solakzâde, Küçük Mehmed Beşe b. Mustafa, Hasan Beşe b. Abdullah, Ömer Efendi b. Ali, İsa Bey