Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 676 Hüküm no: 480 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye’nin merhume annesi Fatma’dan kendisine intikal eden parayı babası Veli Beşe’nin zimmetinden aldığı Mahmiye-i Galataˈya tâbi‘ kasaba-i Tophâneˈde el-Hâc Memi mahallesinde sâkin iken bundan akdem vefat eden Fatma bt. Yusufˈun verâseti zevc-i metrûkü Veli Beşe b. Mansur ile kebîre kızı Rukiye bt. Hasanˈa münhasıra olduğu şer‘an zâhir ve müte‘ayyin oldukdan sonra mezbûre Rukiye meclis-i şer‘de mezbûr Veli Beşe mahzarında ikrâr ve takrîr-i kelâm edip işbu bâ‘isüˈr-rakīm anam müteveffât-ı mezbûrenin terekesinin rub‘ı zevci mezbûra ve selâsete erbâ‘ı bana isâbet etmekle hâlâ merkūm Veli Beşeˈnin vâzi‘uˈl-yed olduğu ber-mûcib-i defter-i kassâm-ı askerî terekesinden benim selâse-i erba‘ hisseme intikāl ve isâbet eden üç bin dokuz yüz otuz üç akçeyi mezbûr Veli Beşe yedinden tamamen ahz u kabz edip husûs-ı mirasa müte‘allika âmme-i de‘âvîden mezbûr Veli Beşeˈnin zimmetini ibrâ-i âm ile ibrâ ve ıskāt eyledim dedikde gıbbeˈt-tasdîkiˈş-şer‘î fiˈl-yevmiˈs-sâmin min-Muharremiˈl-harâm li-sene hamse ve semânîn ve elf. Şuhûdüˈl-hâl: el-Hâc Mustafa b. Mustafa, Hüseyin Bey b. Durmuş, Mustafa Ağa b. Hızır tâbi‘-i kassâm, Mehmed Çelebi b. Durmuş, Hüseyin Çelebi b. Ali ve gayruhum.