Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 766 Hüküm no: 998 Orijinal metin no: [118b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Receb’in, Mehmed Ağa b. Sinan’a borçlu olduğu Mahmiye-i İstanbul’da Kızıltaş mahallesinde sâkin kıdvetü’l-emâsil ve’l-akrân Mehmed Ağa b. Sinan’ın vilâyet-i Rumeli’nde Mora sancağında Halomiç kazâsına tâbi‘ Polocova nâm karyede ve gayrıda berâtla mutasarrıf olduğu ze‘âmetinde subaşı olan Mehmed Bey b. Receb nâm kimesne mahfil-i kazâda müşârün-ileyh Mehmed Ağa tarafından ikrâr-ı âti’l-beyânı tasdîka vekîl olup Mehmed Bey b. Yusuf ve Hüseyin Bey b. Mahmud nâm kimesneler şehâdetleriyle şer‘an vekâleti sâbite olan Memi Bey b. Ömer mahzarında ikrâr ve takrîr-i kelâm edip müşârün-ileyh Mehmed Ağa’ya cihet-i karz-ı şer‘îden bin yüz kıt‘a esedî guruş zimmetimde vâcibü’l-edâ ve lâzımü’l-kazâ deynim olup meblağ-ı merkūmu bin yetmiş sekiz senesinde vâki‘ rûz-ı Kasım’da müşârün-ileyh Mehmed Ağa’ya tamâmen edâya ta‘ahhüd eyledim dedikde mukırr-ı mezbûr Mehmed Bey vech-i meşrûh üzre cârî olan ikrârını vekîl-i merkūm Memi Bey vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mustafa Ağa ez-Za‘îm, Mustafa Bey b. ( ) el-Cündî Şaban Bey b. ( ) Çavuş, Mustafa Çavuş el-Cündî, Mehmed Çelebi b. ( ).