Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 683 Hüküm no: 487 Orijinal metin no: [114a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın, kocası merhum Kaymak Kapudan’ın zimmetindeki mehrini diğer varisten talep ettiği Mahmiye-i Galata hâricinde Şahkulu mahallesinde sâkin iken bundan akdem fevt olan Kaymak Kapudan b. Rıdvanˈın zevce-i metrûkesi Âişe Hanım bt. Mehmed ile vâlidesi Hadîce bt. Hasan nâm hatuna münhasıra olduğu şer‘an zâhir ve müte‘ayyin oldukdan sonra mezbûre Âişe Hanım meclis-i şer‘de tereke-i müteveffâ-yı mezbûra vâzi‘atüˈl-yed olan vâlidesi merkūme Hadîce mahzarında üzerine da‘vâ ve takrîr-i kelâm edip zevcim müteveffâ-yı mezbûrun zimmetinde mütekarrer olan yirmi bin akçe mehr-i müeccelimi kableˈl-istifâ fevt olup hâl-i hayatında meblağ-ı mezbûr hâlâ zimmetinde bana deyni olduğunu huzûr-ı Müslimînˈde ikrâr ve işhâd dahi etmekle terekesine vâzi‘uˈl-yed olan merkūme Hadiceˈden taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden el-Hâc Hasan Efendi b. Abdülgaffar ve Ahmed Efendi b. Mustafa el-imâm li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında zevcim mezbûrenin yirmi bin akçe mehr-i müecceli zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: Mâ-sebak, es-Seyyid Mustafa Çelebi b. es-Seyyid Mehmed, es-Seyyid Hasan Çelebi b. Osman, Mehmed Kapudan b. Muslı, Mehmed Çelebi b. Murad, el-Hâc Ahmed b. Mehmed, es-Seyyid Ömer Çelebi b. Osman