Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 686 Hüküm no: 493 Orijinal metin no: [115a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın çocuklarına vekil olan Osman Çelebi’nin, çocukların annesi ve vasîsi olan Emine’ye açtığı zimmet davasında ibralaştıkları Medîne-i Hazret-i Ebâ Eyyûbeˈl-Ensârî mahallâtında Câmi‘-i Kebîr mahallesinde sâkin iken bundan akdem vefât eden Mehmed Ağa b. Şeyhîˈnin sagīr oğlu Mustafa Çelebi ve sagīre kızı Fatmaˈnın vâlideleri ve vasî-i şer‘îleri olan Emine [bt.] Mehmed nâm hatunun mukaddemâ hüccet-i şer‘iye ile emr-i vesâyete vekîli olan Osman Çelebi b. Mehmed meclis-i şer‘-i şerîfde merkūme Emine Hatun mahzarında ikrâr ve takrîr-i kelâm edip mukaddemâ ben merkūme Emineˈnin vekîli olmağla sagīrân-ı mezbûrânın mâllarını i‘mâl ve icârâtını kabz edip yine emriyle sagīrân-ı mezbûrânın nafaka ve kisvelerine ve akârâtının kırk altı ayda vâki‘ meremmetlerine ve müvekkilem mezbûrenin kendisine verip bu vech üzere sarfımdan sonra ba‘deˈl-hisâb veˈl-kitâb merkūme Emine üzerinde altı bin sekiz yüz altmış üç akçe zuhûr etmekle ben dahi meblağ-ı mezbûru mezkûre Emineˈden da‘vâ ve taleb ettiğimde beynimizde nizâ‘ cereyân etmişidi elhâletü hâzihî merkūme Emineˈden iki bin akçe alıp kabz edip mâ‘adâsından vesâir beynimizde vâki‘ olan ahz u kabz ve i‘tâ ve mu‘âmelât-ı şettâ da‘vâlarından mezbûre Emineˈnin zimmetini ibrâ’-i âmla ibrâ’ ve ıskāt edip min-ba‘d hakk [ve] alâkam kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: Mâ-sebak