Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 687 Hüküm no: 494 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine’nin, kocası merhum Mehmed Ağa zimmetindeki mehir alacağını vasî Osman Çelebi’den talep ettiği Hazret-i Ebâ Eyyûb-ı Ensârî -aleyhi rahmetüˈl-Bârî- mahallâtından Câmi‘-i Kebîr mahallesinde sâkin iken bundan akdem vefât eden Mehmed Ağa b. Şeyhîˈnin verâseti zevce-i metrûkesi Emine bt. Mehmed ile vâlidesi Kaytafa bt. Kurd nâm hatuna ve sulbî sagīr oğlu Mustafa Çelebi ve sagīre kızı Fatmaˈya münhasıra olduğu şer‘an zâhir ve müte‘ayyin oldukdan sonra işbu bâ‘isetüˈl-vesîka mezbûre Emine meclis-i şer‘-i hatîrde tereke-i müteveffâ-yı mezbûra vâzi‘uˈl-yed olup sagīrânın vasî-i şer‘îleri olan Osman Çelebi b. Mehmed mahzarında üzerine da‘vâ ve takrîr-i kelâm edip zevcim müteveffâ-yı mezbûrun zimmetinde mütekarrer olan yirmi bin akçe mehr-i müeccelimi kableˈl-istifâ fevt olup hâl-i hayatında meblağ-ı mezbûrbana deyni olduğunu alâ-ruûsiˈl-işhâd ikrâr ve işhâd dahi etmekle hâlâ tereke-i vâfiyesinden taleb ederim mezbûr Osman Çelebiˈye suâl olunsun dedikde gıbbeˈs-suâl veˈl-inkâr ve isre-tâlibüˈl-beyyine udûl-ı Müslimînˈden Mehmed Ağa b. Eyüb ve Ahmed Usta b. Abdullah nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-hakīka müteveffâ-yı mezbûr hayatında zevcem işbu Emineˈnin yirmi bin akçe mehr-i müeccelimi zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre aleˈl-vechiˈl-meşrû‘â tahlîfden sonra mûcebiyle hüküm birle mâ vaka‘a biˈt-taleb ketb olundu. Fiˈl-âşir min-Saferiˈl-hayr li-sene hamse ve semânîn ve elf. Şuhûdüˈl-hâl: Mâ-sebak