Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 688 Hüküm no: 495 Orijinal metin no: [115b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın çocuklarına vekil olan Haseki Mustafa Ağa’nın, eski vekil Osman Çelebi’ye açtığı zimmet davasında ibralaştıkları Medîne-i Hazret-i Ebâ Eyyûbeˈl-Ensârî mahallâtından Câmi‘-i Kebîr mahallesinde sâkin iken bundan akdem vefât eden Mehmed Ağa b. Şeyhîˈnin sulbî sagīr oğlu Mustafa Çelebi ve sagīre kızı Fatmaˈnın tesviye-i emirlerine kıbel-i şer‘den mansûb vasîleri ve vâlideleri Emine bt. Mehmed nâm hatunun hüccet-i şer‘iye ile vekîl olan zevci fahrüˈl-eşbâh Haseki Mustafa Ağa b. Ahmed meclis-i şer‘de mukaddemâ mezbûre Emineˈnin husûs-ı câ’iye vekîl-i şer‘îsi ve karındaşı bâ‘isüˈr-rakīm Osman Çelebi b. Mehmed mahzarında biˈl-vekâle ikrâr ve takrîr-i kelâm edip bundan esbak mezbûr Osman Çelebi mezbûre Emineˈnin kendi emrine ve vesâyet emrine hüccet-i şer‘iye ile vekîli olmağla bin seksen senesi şehri Rebî‘ülâhiriˈnde işbu târih-i kitâba gelince sagīrân-ı mezbûrânın ber-mûceb-i defter-i kassâm-ı askerî makbûzu olan elli yedi bin yüz yetmiş akçeyi zimemden yerlü yerinde rihânı ile bana gösterip asl-ı mal-ı merkūmdan yedinde bir akçe kalmayıp ben dahi biˈl-vekâle kabûl ettiğimden sonra târih-i mezbûrdan işbu târih-i kitâb gününe gelince kırk altı ayda ancak on bir bin altı yüz yirmi beş akçe murâbaha-i şer‘iye kabz edip ve icârâtından dahi mezbûr Osman Çelebi ayda yedişer yüz ellişer akçeden kırk altı ayda otuz iki bin beş yüz altmış akçe ki min-haysüˈl-mecmû‘ kırk dört bin yüz seksen beş akçeyi mezbûr Osman Çelebi biˈl-vekâle kabz ettikden sonra mezbûr Osman Çelebi meblağ-ı mezbûr kırk dört bin yüz seksen beş akçenin on sekiz bin akçesini sagīrân-ı mezbûrânın hüccet-i şer‘iye ile nafaka ve kisveleri’çün vasî-i mezbûra verip ve on bin iki yüz seksen dört akçesini sagīrân-ı mezbûrânın hânesi vesâir akārâtı meremmetine vasî-i mezbûrun emriyle sarf edip ve on bin iki yüz otuz dokuz akçesini biˈd-defâ‘at vasî-i mezbûra verip ve iki bin yüz altmış akçe mahzen icâresine ve Edirneˈden gelirken yol harcına ve on üç bin altı yüz yirmi iki akçesini yine vasî-i mezbûrun emriyle sagīrân-ı mezbûrânın kırk altı ayda vâki‘ olan îdlerde müceddeden kat‘ olunan libâslarına harc edip ve asma çardağınadahi dört yüz doksan beş akçe ki min-haysüˈl-mecmû‘ elli dört bin sekiz yüz akçe sarf edip asl-ı mâl ve murâbaha ve icâreden mezbûr Osman Çelebi yediyle bir akçe ve bir habbe kalmayıp husûs-ı mezbûra müte‘allika da‘vâdan biˈl-vekâle mezbûr Osman Çelebiˈnin zimmetini ibrâ’ eyledim dedikde gıbbeˈt-tasdîk mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene [10]85. Şuhûdüˈl-hâl: Mâ-sebak