Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 689 Hüküm no: 496 Orijinal metin no: [116a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın çocuklarına vasî olan Emine’nin vekili olan Osman Çelebi’nin, Emine Hanım’la tereke gelirleri ve harcamaları üzerine ibralaştıklarına dair belge talep ettiği Medîne-i Hazret-i Ebâ Eyyûb mahallâtından Câmi‘-i Kebîr mahallesinde sâkin işbu bâ‘isüˈl-vesîka Osman Çelebi b. Mehmed meclis-i şer‘-i hatîrde mahalle-i mezbûrede sâkin iken bundan akdem vefât eden Mehmed Ağa b. Şeyhîˈnin sulbî sagīr oğlu Mustafa Çelebi ve sagīre kızı Fatmaˈnın tesviye-i emirlerine kıbel-i şer‘den mansûbe vasî olan vâlideleri Emine bt. Mehmed mahzarında takrîr-i kelâm bundan akdem mezbûre Emine beni emr-i vesâyete ve kendi emrine vekîl edip ben dahi ba‘deˈl-kabûl bin seksen bir senesi şehri Rebî‘ülâhiriˈnde târih-i kitâb gününe gelince kırk altı ayda sagīrân-ı mezbûrânın mâllarını i‘mâl ve akārâtlarının icârâtlarını biˈl-vekâle kabz edip ba‘dehû merkūme Emineˈnin emriyle makbûzum olan icârât ve merâmmâtı sagīrân-ı mezbûrânın nafaka ve kisvelerine ve harçlıklarına ve akārâtlarının imâret ve meremmetlerine me’mûren biˈl-vekâle harc ve sarf etmişdim elhâletü hâzihî vasî-i mezbûra hakīkat-i hâl suâl olunup ikrârı tahrîr ve sûreti yedime verilmek matlûbumdur dedikde gıbbeˈs-suâl mezbûre Emine cevâbında kazıyye bâlâda tahrîr olunduğu üzere ikrâr ve i‘tirâf etmeğin mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: Mâ-sebak