Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 767 Hüküm no: 999 Orijinal metin no: [118b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Halil b. Musa’nın çocuklarına vasî olan Mehmed Bey b. Receb’in, Mehmed Efendi b. Ali’nin el koyduğu terekeden hisseleri aldığı Vilâyet-i Anadolu’da Mudurnu kazâsına tâbi‘ Avdullar nâm karye ahâlîsinden iken fevt olan Halil b. Musa’nın sagīre kızları Cennet ve Ümmühâni’nin tesviye-i umûrları için taraf-ı şer‘den vasî nasb olundukdan sonra vesâyet-i mezbûreyi kabûl eden râfi‘ü’l-kitâb Mehmed Bey b. Receb nâm kimesne meclis-i şer‘de mahmiye-i İstanbul’da Hasbahçe’de bostancı iken bundan akdem vefât eden bağcı Mustafa Bey b. Halil’in li eb karındaşı Mehmed nâm sagīrin vasiyy-i muhtârı olmağla tereke-i müteveffâ-yı mezbûra vâzı‘ü’l-yed olup Hastalar imâmı olan Mehmed Efendi b. Ali nâm kimesne mahzarında da‘vâ ve takrîr-i kelâm edip müteveffâ-yı mezbûr ile vasîleri olduğum sagīretân-ı mezbûretân li eb karındaşlar olup babaları ismi Halil b. Musa ve maskat-ı re’sleri karye-i mezbûre olup müteveffâ-yı mezbûrun verâseti sagīretân ile mezbûr Mehmed Efendi’nin vasîsi olduğu sagīr-i mezbûr Mehmed’e münhasıra iken mezbûr Mehmed Efendi tereke-i müteveffâ-yı mezbûrdan dört sehimden sagīretân-ı mezbûretânın hisseleri olan iki sehmi bana teslîmden imtinâ‘ eder suâl olunup ihkāk-ı hak olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda karye-i mezbûre ahâlîsinden Sâlih b. Musli ve Mustafa b. Yusuf nâm kimesne[ler] li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr ile sagīretân-ı mezbûretân Cennet ve Ümmühâni li eb karındaşlar olup babaları ismi Halil b. Musa ve maskat-ı re’sleri karye-i mezbûre olup müteveffâ-yı mezbûrun verâseti sagīretân-ı mezbûretân ile li eb karındaşı sagīr-i mezbûr Mehmed’e münhasıradır, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince sagīretân-ı mezbûretânın vech-i muharrer üzre verâsetlerine hükm olunup tereke-i müteveffâ-yı mezbûrun dört sehimden iki sehmini müdde‘î-i mezbûra teslîme merkūm Mehmed Efendi’ye tenbîh olunmağın mâ vaka‘a bi’t-taleb ketb olundu. Fî selhi Ramazâni’l-mübârek li sene seb‘a ve seb‘în ve elf. Şuhûdü’l-hâl: Hasan Beşe b. Abdullah Çukadâr, Mehmed Çelebi b. ( ) Kethüdâ-yı muhzırân, Hasan Çelebi b. Ahmed, Abdi Çelebi b. Hüseyin, Mehmed Beşe b. Ramazan.