Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 689 Hüküm no: 497 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Odabaşı’nın, merhum Mehmed Çelebi zimmetindeki gulam bahasından alacağını varislerinden talep ettiği İşbu râfi‘üˈr-rakīm Mustafa Odabaşı b. Ebûbekir meclis-i şer‘-i şerîfde mahmiye-i Galata muzâfâtından kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin verâseti zevce-i metrûkesi Ümmügülsüm bt. Mustafa ile vâlidesi Emine bt. Abdullahˈa ve sagīre oğlu Mustafa ve sagīre kızı Rukiyeˈye münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emirlerine kıbel-i şer‘den mansûbe vasîleri olan Meryem bt. Mustafa Kapudan nâm hatun tarafından husûs-ı câ’îye vekîl olan Ahmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz evsâfı beynimizde ilm-i şer‘î ile ma‘lûm bir nefer gulâm bahâsından doksan esedî guruş hakkım olup meblağ-ı mezbûru kableˈl-istifâ fevt olup hâl-i hayatında meblağ-ı mezbûr zimmetinde bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ meblağ-ı mezbûru vasî-i merkūmdan taleb ederim vekîl-i mezbûra suâl olunsun dedikde gıbbeˈs-suâl ve akībeˈl-inkâr ve isre-talebüˈl-beyyine udûl-ı Müslimînˈden el-Hâc Mehmed b. Musa ve Mahmud Çelebi b. el-Hâc Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında müdde‘î-i mezbûra vech-i muharrer üzre gulâm semeninden meblağ-ı mezbûr doksan esedî guruş zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈs-sâmin-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: İsmail Efendi b. Mehmed el-imâm, Mustafa Ağa b. Abdülmennan, Mehmed Halîfe b. Kenan, Davud Çelebi b. Bali, Mehmed b. Derviş, diğer Mehmed Halîfe mü’’zzin-i câmi‘-i şerîf, İbrahim b. Ömer