Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 690 Hüküm no: 498 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in, merhum Mehmed Çelebi zimmetindeki ağ bahasından ve borç hususundaki alacaklarını varislerden talep ettiği İşbu râfi‘üˈr-rakīm el-Hâc Mehmed b. Musa meclis-i şer‘-i şerîfde mahmiye-i Galataˈya tâbi‘ kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin verâseti zevce-i metrûkesi Ümmügülsüm bt. Mustafa ile vâlidesi Emine bt. Abdullahˈa ve sagīr oğlu Mustafa ve sagīre kızı Rukiyeˈye münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emirlerine kıbel-i şer‘den mansûbe vasîleri olup tereke-i müteveffâ-yı mezbûra vâzi‘atüˈl-yed olan ceddeleri Meryem bt. Mustafa tarafından husûs-ı âtiˈz-zikre vekîl-i müsecceli olan Ahmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz ağ bahâsından ve cihet-i karzdan yetmiş beş esedî guruş hakkım olup meblağ-ı mezbûru kableˈl-istifâ fevt olup hâl-i hayatında meblağ zimmetinde bana deyni olduğunu huzûr-ı Müsliminde ikrâr ve işhâd etmekle hâlâ terekesine vâzi‘uˈl-yed olan vasî-i mezbûrdan taleb ederim vekîl-i mezbûra suâl olunsun dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl-ı ricâlden Osman Çelebi b. Habib ve Mehmed b. Derviş nâm kimesneler li-ecliˈş-şehâde meclis-i şer‘a hâzırân olup gıbbeˈl-istişhâd fiˈl-hakīka müteveffâ-yı mezbûre hayatında müdde‘î-i mezbûra vech-i meşrûh üzere ağ bahâsından ve karzdan cem‘an yetmiş beş esedî [116b] guruş zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr aleˈl-vechiˈl-meşrû‘ ve tahlîfden sonra mûcebiyle hüküm birle mâ vaka‘a biˈt-taleb ketb olundu. Fiˈs-sâmin-i aşer min-Saferiˈl-hayr li-sene [10]85. Şuhûdüˈl-hâl: Abdülkerim Efendi b. Rasûl, Kadri Çelebi b. Yusuf, Rasûl Efendi b. Bayram, Hasan Çelebi b. İplikçi, Hasan b. Abdullah