Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 700 Hüküm no: 504 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey’in, merhum Mehmed Çelebi zimmetindeki alacaklarını varislerden talep ettiği İşbu bâ‘isüˈl-vesîka Hüseyin Bey b. Hamza nâm bostânî meclis-i şer‘-i şerîfde mahmiye-i Galataˈya tâbi‘ kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin verâseti zevce-i metrûkesi Ümmügülsüm bt. Mustafa ile vâlidesi Emine [bt.] Abdullah ve sulbî sagīr oğlu Mustafa ve sagīre kızı Rukiyeˈye münhasıra olduğu zâhir ve müte‘ayyin oldukdan sonra sagīrân-ı mezbûrân Mustafa, Rukiyeˈnin büyük vâlidesi ve tesviye-i emirlerine kıbel-i şer‘den mansûbe vasîleri olan Meryem bt. Mustafa nâm hatunun vekîl-i müsecceli olan Ahmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz ağ bahâsından otuz beş esedî guruş ve cihet-i karzdan on bir esedî guruş ki cem‘an kırk altı esedî guruş hakkımı kableˈl-ahz vefât etmekle hâlâ vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden Hüseyin Bey b. Osman el-Bostânî ve merhûm-ı mezbûrun karındaşı Mahmud Çelebi b. el-Hâc Mehmed li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûra işbu müdde‘î-i mezbûr Hüseyin Bey bizim huzûrumuzda on bir guruş ikrâz ol dahi ba‘deˈl-istikrâz otuz beş esedî guruş kıymetli ağ bey‘ ve teslîm ol dahi iştirâ ve tesellüm eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîfiˈş-şer‘î mûcebiyle hüküm birle mâ vaka‘a biˈt-taleb ketb olundu. Li-sene hamse ve semânîn ve elf. Şuhûdüˈl-hâl: Hasan Çelebi b. İshak, Hüseyin Bey b. Hamza, Habib Bey b. Pervâne, Ahmed Bey b. Mehmed, Ömer Çelebi b. Ali, Hüseyin Çelebi b. Ali