Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 768 Hüküm no: 1000 Orijinal metin no: [118b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Kostantin’in, Hasan Bey’e kürk bahasından borçlu olduğu Mahmiye-i Edirne’de vâki‘ Saray-ı cedîd-i sultânî ebvâbından Mekkiyekapısı bekçisi olan Hasan Bey tarafından husûs-ı âti’l-beyâna vekîl olduğu Mirahor Mustafa Bey b. Ramazan ve sarrâc Ahmed Bey b. Ali nâm kimesneler şehâdetleriyle şer‘an sâbit olan umdetü’l-emâsil ve’l-akrân Fazlullah Ağa b. Hasan dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîf-i Ahmedî ve mahfil-i dîn-i münîf-i Muhammedî’de kürkçü tâifesinden Dimitri v. Kostantin nâm zimmî mahzarında üzerine da‘vâ ve takrîr-i kelâm edip müvekkilim mezbûr Hasan Bey’in yedinden müşterâ ve makbûz beynlerinde ma‘lûm samur kürk bahâsından mezbûr Dimitri zimmetinde iki yüz esedî guruş hakkı vardır, suâl olunup alıverilmek matlûbumdur dedikde gıbbe’s-suâl mezbûr Dimitri müvekkil-i mezbûr cihet-i mezbûrdan zimmetinde vâcibü’l-edâ ve lâzımü’l-kazâ iki yüz esedî guruş deynini tâyi‘an ikrâr ve i‘tirâf etmeğin mûcebince meblağ-ı mezbûru vekîl-i mûmâ-ileyhe edâya merkūm Dimitri’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-akrân İsmail Ağa b. ( ) Serçavuşân, fahrü’l-eşbâh Şaban Ağa Ser-muhzırân, umdetü’l-eşbâh Eyüb Ağa Kethüdâ-yı hazret-i efendi, Hasan Beşe Çukadâr.