Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 768 Hüküm no: 1001 Orijinal metin no: [118b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avadik b. Allahverdi’nin ölen ortağı Ohannis ile topladığı cizye paralarından herhangi bir borcu olmadığı, Ohannis’in vârisi ile de hesaplaştığı Diya[r]bekir sancağında Çüngüş kazâsında Üveys nâm karye ahâlîsinden olup bundan akdem mahmiye-i İstanbul’da hâlik olan Ohannis v. Meniş nâm Ermeni’nin sulbî oğlu Mardiros nâm sagīrin vasiyy-i muhtârı olan Toros v. Haçuk nâm Ermeni mahfil-i kazâda karye-i merkūme ahâlîsinden Avadik b. Allahverdi nâm Ermeni muvâcehesinde üzerine da‘vâ ve takrîr-i kelâm edip karye-i mezbûre ahâlîsinden bin yetmiş yedi senesinde üzerlerine edâsı lâzım gelen cizyelerini cem‘a taraf-ı aliyyeden memûr olan Şaban Ağa nâm kimesneden karye-i mezbûre ahâlîsinin cizyelerini cem‘a merkūm Avadik ta‘ahhüd ve iltizâm eyledikde husûs-ı mezbûrda mezbûr Avadik ile şerîk olmak için hâlik-i mezbûr Ohannis mezbûr Şaban Ağa’ya ver deyû yüz seksen kıt‘a esedî guruşunu mezbûr Avadik’e teslîm eyledikden sonra husûs-ı mezbûrda şirketden ferâğ edip meblağ-ı mezkûr yüz seksen guruşun doksan guruşunu merkūm Avadik’den geri alıp doksan guruşu merkūm Avadik yedinde kalıp kable’l-istîfâ merkūm Ohannis hâlik olmağın suâl olunup [119a] meblağ-ı bâkī-i mezbûr doksan guruşun merkūm Avadik’den alıverilmesi matlûbumdur dedikde, gıbbe’s-suâl Avadik cevâbında hâlik-i mezbûr Ohannis’e hâl-i hayâtında meblağ-ı bâkī-i mezbûr doksan guruşunu dahi bin yetmiş altı Zilka‘desi’nin yirmi beşinci gününde def‘ ve teslîm eyledikde vech-i muharrer üzre bana def‘ eylediği yüz seksen guruşdan yedimde bir akçe ve bir habbesi bâkī kalmayıp mecmû‘unu yedimden ahz ve istîfâ ettiğini ikrâr edip husûs-ı mezkûra müte‘allika da‘vâdan zimmetimi ibrâ eylemiş idi deyû def‘le mukābele edicek gıbbe’l-istintâk ve’l-inkâr merkūm Avadik’den def‘-i mezbûrunu mübeyyine beyyine taleb olundukda Karaman’da kepekçi tâifesinden olan Serkis v. Marat ve Zaharya v. Kiryakos nâm Ermeniler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka merkūm Ohannis hâl-i hayâtında bin yetmiş altı Zilka‘desi’nin yirmi beşinci gününde vech-i mübeyyen üzre mezbûr Avadik yedinde bâkī kalan doksan guruşu bizim huzûrumuzda merkūm Avadik yedinden ahz ve istîfâ eyledikde, bundan akdem karye-i mezbûre ahâlîsinin bin yetmiş yedi senesinde üzerlerine edâsı lâzım gelen cizyelerini cem‘a merkūm Avadik ile şerîk olmak için mezbûr Avadik’e bundan akdem def‘ ve teslîm eylediğim yüz seksen guruşun doksanını mukaddemâ yedinden almış idim hâliyâ doksanını dahi alıp meblağ-ı mezbûrdan merkūm Avadik yedinde bir akçe ve bir habbe hakkım kalmayıp husûs-ı mezbûra müte‘allika da‘vâdan merkūm Avadik’in zimmetini ibrâ eyledim deyip ikrâr ve ibrâsına bizi işhâd etmiş idi, bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Mardiros vech-i muharrer üzre mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Çelebi b. Ahmed, İbrahim Çelebi b. Ahmed, Mehmed Bey b. Abdullah, Hasan Çelebi b. Bayram.