Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 711 Hüküm no: 516 Orijinal metin no: [120b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz b. Abdullah’ın, merhum Mustafa Kapudan’ın azatlı kölesi olduğu, varislerin kölelik iddialarının reddedildiği İşbu orta boylu, açık kaşlı, Rusiyyüˈl-asl râfi‘üˈr-rakīm İvaz b. Abdullah meclis-i şer‘de mahmiye-i Galataˈya tâbi‘ kasaba-i Kasımpaşaˈda el-Hâc Hasan mahallesinden olup bundan akdem tarîk-i hâcc-ı şerîfde vefât eden el-Hâc Mustafa Kapudan b. İbrahimˈin verâseti zevce-i metrûkesi Rahime bt. Veli ile sulbî sagīr oğlu Mustafa ve sagīre kızı Âişeˈye münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emirlerine vasî-i muhtârları olan İsmail Çelebi b. Veli mahzarında da‘vâ ve takrîr-i kelâm edip ben müteveffâ-yı mezbûrun abd-i memlûku olup mülkünde olduğum hâlde müteveffâ-yı mezbûr işbu sene-i mübârekede hâcc-ı şerîfe azîmet ettikde hasbeten lillâh-i te‘âlâ huzûr-ı şuhûdda tedbîr-i mutlak ile müdebber ve işhâd edip hâlâ vefât etmekle ve terekesinin sülüsü benim kıymetime müsâ‘id olmağla ben hür olmuş iken vasî-i mezbûr bana rık olmak üzere vaz‘-ı yed murâd [eder] suâl olunup üzerimden yed-i âdiyesi nez‘ ve sebîlim tahliye olunması matlûbumdur dedikde gıbbeˈs-suâl veˈl-inkâr müdde‘î-i mezbûr İvazˈdan müdde‘âsına beyyine taleb olundukda udûl-ı Müslimînˈden Mustafa Çelebi b. Hüseyin ve Abdullah Çelebi b. Hüseyin li-ecliˈş-şehâde meclis-i şer‘a hâzırân olup eserüˈl-istişhâd fiˈl-vâki‘ müteveffâ-yı mezbûr sene-i mübârekede hâcc-ı şerîfe teveccüh ettikde gulâm-ı mezbûrİvazˈı hasbeten lillâh-i te‘âlâ huzûrumuzda tedbîr-i mutlak ile müdebber edip ve bizi işhâd ettikden sonra hâlâ vefât ve terekesinin sülüs-ı merkūmu İvazˈın kıymetine müsâ‘id olmağla mezbûr İvaz sâir ahrâr gibi hür olmuşdur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hükm birle mâ vaka‘a biˈt-taleb ketb olundu. Fiˈl-yevmiˈs-sânî-i aşer min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: es-Sâbıkūn