Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 713 Hüküm no: 518 Orijinal metin no: [120b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Neslihan bt. Hüseyin’in küçük kızı Ayşe’nin vasîsi olan Mustafa Çelebi’ye, Ayşe için harcama yapmasına izin verilmesi Mahmiye-i Galata tevâbi‘inden kasaba-i Tophâneˈde Çukurcum‘a mahallesinde sâkine iken bundan akdem vefât eden Neslihan bt. Hüseyin nâm hatunun sadriye sagīre kızı Âişeˈnin tesviye-i umûruna meclis-i şer‘den mansûb vasîsi olan işbu bâ‘isüˈl-kitâb Mustafa Çelebi b. Hasan meclis-i şer‘de biˈl-vesâye takrîr-i kelâm edip vasîsi olduğum sagīre-i mezbûreye anası müteveffât-ı mezbûrenin terekesinden intikāl eden mâlından kifâyet mikdârı nafaka ve kisve-bahâ farz ve takdîr olunup sarfına dahi izin verilmek murâdımdır dedikde hâkim-i muvakki‘-i sadr-ı kitâb tûbâ-lehû ve hüsnü-meâb hazretleri dahi sagīre-i mezbûre Âişeˈye anası müteveffât-ı mezbûrenin terekesinden intikāl eden mâlından târih-i kitâb küllî yevm üç akçe nafaka ve kisve-bahâ farz ve takdîr edip meblağ-ı mezbûru sagīre-i mezbûra harc u sarfa ve vakt-i zarûretde istidâneye ve hîn-i zaferde rücû‘a mezbûr Mustafa Çelebiˈye izin verilip mâ hüveˈl-vâki‘ biˈt-taleb ketb olundu. Fiˈl-yevmiˈs-sâlis-i aşer min-Rebî‘iˈl-evvel li-sene hamse ve semânîn ve elf. Şuhûdüˈl-hâl: Abdullah Efendi b. Ali, Hüseyin Çelebi b. Ali, Ali Bey b. Musa, Osman Çelebi b. Abdullah, Müncî? Ahmed Beşe, Mehmed b. Mustafa