Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 769 Hüküm no: 1002 Orijinal metin no: [119a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kenan b. Hüseyin’in ölen el-Hâc Ali’nin terekesini almadığı ve vasîden gizlemediği Mahmiye-i İstanbul’da Ali Paşa-yı [Atîk] mahallesinde sâkin iken bundan akdem vefât eden el-Hâc Ali b. Mehmed nâm kimesnenin hasren vârisleri olan sulbî sagīr oğlu Ahmed ve sulbiye sagīre kızı Âişe’nin tesviye-i umûrlarına kıbel-i şer‘den mansûb vasîleri olan Abdurrahman b. Ömer nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb Kenan b. Hüseyin nâm kimesne mahzarında bi’l-vesâye üzerine da‘vâ ve takrîr-i kelâm edip merkūm Kenan müteveffâ-yı mezbûr el-Hâc Ali Bey eniştesi olmağla bi gayrı hakkın muhallefâtından iki yüz esedî guruşunu ahz ve ihfâ eylemişdir, suâl olunup ihkāk-ı hak olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin merkūm Kenan’a müteveffâ-yı mezbûrun terekesinden meblağ-ı mezbûr iki yüz esedî guruşunu bi gayrı hakkın ahz ve ihfâ etmeyip elân üzerine red ve emsâlini zamân lâzım olmadığına yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Abdurrahman Çelebi [b.] Ömer, Musa b. Bekir, Mustafa b. Murtaza, Ali Çelebi b. Mustafa, Şükrullah Bey b. Mustafa.