Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 725 Hüküm no: 530 Orijinal metin no: [123b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in, oğlu Hamza’ya vasi, merhumun kız kardeşi Fatma ile Mehmed Çavuş ile Seyfi Çavuş’un da vasiye nâzır tayin edildikleri Mahmiye-i Galataˈya tâbi‘ kasaba-i Kasımpaşaˈda Yeldeğirmeni mahallesi sükkânından olup işbu sene-i mübârekede tarîk-i hâcc-ı şerîfde vefât eden el-Hâc Hasan Çavuş b. Hamzaˈnın sulbî sagīr oğlu Hamzaˈya babasından intikāl eden mâlını hıfz ve hâlini zabta bir vasîden lâ-büd olmağın hâkim-i muvakki‘-i sadr-ı kitâb ve tûbâ-lehû ve hüsnü-meâb hazretleri sagīr oğlu mezbûrun anası bâ‘ise-i hâzeˈl-kitâb Âişe bt. Mehmed her vecihle emr-i vesâyeti ikâmete kādire olmağla minvâl-i muharrer üzere sagīr-i mezbûrun tesviye-i emrine kıbel-i şer‘de mezbûre Âişeˈyi vasî nasb ve ta‘yîn ettikde ol dahi kabûl ve merâsimini edâya müte‘ahhide olmağın merkūme Âişeˈnin üzerine müteveffâ-yı mezbûrun li-ebeveyn kız karındaşı Fatma nâm hatun ile el-Hâc Mehmed Çavuş b. Davud ve Seyfi Çavuş b. Hüseyin nâm kimesneleri hasbî nâzır ta‘yîn ettikde anlar dahi kabûl ve hizmet-i lâzımelerini edâya ta‘ahhüd eylediklerinde mâ vaka‘a biˈt-taleb ketb olundu. Fiˈl-işrîn min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Zahrüˈl-müderrisîniˈl-kirâm Hüseyin Efendi b. Abdülkerim, eş-Şeyhî Mehmed Efendi b. Hüseyin Efendi, Mehmed Çelebi b. İbrahim, Ahmed Çavuş b. Mehmed, el-Hâc Abdurrahman b. Yusuf, İbrahim Çelebi b. Ali, Molla İbrahim b. Ramazan, Hüseyin Çelebi b. Ali Vesâyet ve nezâret hücceti