Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 744 Hüküm no: 544 Orijinal metin no: [126b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Abdullah’ın, varissiz ölen Hasan Kapudan’ın azatlı kölesi olduğundan beytülmal emininin kölelik iddiasının reddedildiği Uzun boylu, sarışın, Rusiyyüˈl-asl râfi‘atüˈl-vesîka Havva bt. Abdullah meclis-i şer‘-i şerîfde mahmiye-i Galata muzâfâtından kasaba-i Kasımpaşaˈda Çatma Mescid mahallesinde sâkin iken bundan akdem vefât eden Hasan Kapudan b. Hüseyinˈin zâhirde vârisi-i ma‘rûfu olmamak ile muhallefâtı cânib-i beytü’l-mâle râci‘ olmağla hâlâ mahmiye-i mezbûre ve tevâbi‘inde emîn-i beytü’l-mâl olup hâlâ tereke-i müteveffâ-yı mezbûre vâzi‘uˈl-yed olan Mehmed Ağa b. Ali mahzarında üzerine da‘vâ ve takrîr-i kelâm edip ben müteveffâ-yı mezbûrun abd-i memlûku olup mülkünde olduğum hâlde bir buçuk sene mukaddem hasbeten lillâh-i te‘âlâ huzûr-ı Müslimînˈde tedbîr-i mutlak ile müdebbere ve ikrâr ve Müslimînˈi işhâd edip hâlâ vefât etmekle ve terekesinin sülüsü kıymetime müsâ‘id olmağla ben hürre olmuş iken emîn-i mezbûr bana rık olmak üzere vaz‘-ı yed murâd eder suâl olunup sebîlim tahliye ve üzerimden yed-i âdiyesini nez‘ olunması matlûbumdur dedikde gıbbeˈs-suâl ve akībeˈl-inkâr mezbûre Havvaˈdan müdde‘âsını müsbite beyyine taleb olundukda udûl-ı ricâlden Câmi‘-i Kebîr müezzini Ramazan Çelebi b. el-Hâc Abdullah ve el-Hâc Hasan b. Zülfikar ve Mehmed Çelebi b. İbrahim ve Osman b. Hasan nâm kimesneler li-ecliˈş-şehâde meclis-i şer‘a hâzırûn olup eserüˈl-istişhâd fiˈl-vâki‘ müteveffâ-yı mezbûr bir buçuk sene mukaddem hasbeten lillâh-i te‘âlâ câriye-i memlûkesi olan mezbûre Havvaˈyı bizim huzûrumuzda tedbîr-i mutlak ile müdebbere edip ve bizi işhâd ettikden sonra hâlâ vefât edip ve terekesinin sülüsü dahi mezbûre Havvaˈnın kıymetine müsâ‘ade olmağla mezbûre Havva sâir ahrâr gibi hürre olmuşdur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sânî min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: es-Sâbıkūn