Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 746 Hüküm no: 546 Orijinal metin no: [127a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî Zeyneddin’in, merhum Ahmed Reis’in ortağı Usta Ahmed’in zimmetindeki alacağını teslim aldığı Mahmiye-i Galata dâhilinde Boluoğlu mahallesinde sâkin el-Hâc Zeyneddin b. Ali meclis-i şer‘-i şerîfde işbu bâ‘isüˈl-vesîka Usta Ahmed b. İbrahim mahzarında ikrâr ve takrîr-i kelâm edip mahalle-i mezbûrede sâkin iken bundan akdem vefât eden el-Hâc Ahmed Reisˈin mezbûr Usta Ahmed hayatında şerîki olmağla müteveffâ-yı mezbûrun merkūm Usta Ahmed zimmetinde deyn-i şer‘îden olan yirmi bin akçe hakkı kableˈl-istifâ mezbûr el-Hâc Mehmed Reis fevt olup meblağ-ı mezbûr sagīr oğlu Abdullah ve sagīre kızı Hadiceˈye isâbet ettikden sonra mukaddemâ ben sagīrân-ı mezbûrânın tesviye-i emirlerine kıbel-i şer‘den mansûb vasîleri olmağla meblağ-ı mezbûr yirmi beş bin akçe mukaddemâ zamân-ı vesâyetimden biˈt-tamam alıp kabz edip meblağ-ı mezbûrdan merkūm Usta Ahmed zimmetinde bir akçe ve bir habbe bâkī kalmadı dedikde gıbbeˈt-tasdîkiˈş-şer‘îyyüˈl-mu‘teber mâ vaka‘a biˈt-taleb ketb olundu. Fiˈl-yevmiˈs-sâmin-i aşer min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Hasan Yazıcı b. Musa, el-Hâc Şa‘bân b. el-Hâc Ahmed, Uzun Mahmud Beşe b. Mustafa, Abdi Çelebi b. Abdüllatif, el-Hâc Halîfe b. Kasım, Mustafa Reis b. Yusuf, Kefeli Ahmed Beşe b. Mavnacı, Ali Bey b. Halil