Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 746 Hüküm no: 547 Orijinal metin no: [127a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakızlı Yorgi v. Nikola’nın, varissiz ölen Kemanî Hasan Kapudan’ın zimmetindeki gemi kirasından olan alacağını beytülmal emininden talep ettiği Mellâh tâifesinden işbu râfi‘üˈs-sifr Sakızlı Yorgi v. Nikola meclis-i şer‘de mahmiye-i Galata muzâfâtından kasaba-i Kasımpaşaˈda Çatma Mescid mahallesinde sâkin iken bundan akdem vefât eden Kemânî Hasan Kapudan b. Hüseyinˈin zâhirde vâris-i ma‘rûfu olmayıp terekesi cânib-i beytü’l-mâle â’id olmağın hâlâ mahmiye-i mezbûrede ve tevâbi‘inde beytü’l-mâl emîn olup tereke-i müteveffâ-yı mezbûra vâzi‘uˈl-yed Mehmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr hâl-i sıhhatinde Cezîre-i Sakızˈdan kasaba-i mezbûrede sefîne malı getirmek içün yirmi beş guruş navlunuyla sefîne îcâr ol dahi istîcâr ve müteveffâ-yı mezbûru cezîre-i mezbûreden kasaba-i mezkûreden müteveffâ-yı mezbûr yedinden yedi guruşunu hâl-i sıhhatinde kabz edip bâkī on sekiz guruşumu kableˈl-istifâ fevt olup hâl-i hayatında vech-i muharrer üzere yirmi beş guruş ücret ile sefînemi istîcâr ettiğini huzûr-ı Müslimînˈde ikrâr ve işhâd dahi etmişidi hâlâ meblağ-ı mezbûru emîn-i mezbûrdan taleb ederim dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden Ahmed b. Ali ve Hasan b. Abdullah nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında müdde‘î-i mezbûrun sefînesini yirmi beş guruşa cezîre-i mezbûreden kasaba-i mezbûra gelince sefînesini istîcâr edip hâlâ ücret-i mezkûre zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr Yorgiˈye aleˈl-vechiˈl-meşrû‘ tahlîfden sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâlis-i aşer min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Ali Çavuş b. Cafer el-mübâşir, Ömer Efendi b. Ali, İsa Beşe b. Halil, Hüseyin Çelebi b. Ali ve gayruhum