Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 757 Hüküm no: 555 Orijinal metin no: [128b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Mehmed’in varislerinin birbirleri hakkında açtıkları tereke davasından vazgeçtikleri Mahmiye-i Galata muzâfâtından kasaba-i Kasımpaşaˈda Çatma Mescid mahallesinde sâkine Safiye bt. Ali Ağa nâm hatun tarafından husûs-ı âtiˈl-beyâna vekîl olup mezbûrenin zâtını ma‘rifet-i şer‘iye ile ârifân olan Ali Çelebi b. Murteza ve Ahmed Çelebi b. Ali şehâdetleriyle şer‘an hâli sâbite olan Mustafa b. Murteza meclis-i şer‘de li-ebeveyn karındaşı işbu bâ‘isüˈl-kitâb Mustafa Çelebi mahzarında biˈl-vekâle ikrâr ve takrîr-i kelâm edip müvekkilem mezbûre Safiye ile mezbûr Mustafa Çelebiˈnin babaları olup bundan akdem fevt olan Ali Ağa b. Mehmedˈin terekesinden beynlerinde ma‘lûme ba‘zı eşyâyı ketm ve ihfâ eylemişdir deyü müvekkilem mezbûre hisse-i şer‘iyesini merkūm Mustafa Çelebiˈden da‘vâ ve taleb etmişdim el-hâletü hâzihî müvekkilem mezbûre Safiye karındaşı mezbûr Mustafa Çelebiˈnin işbu ma‘lûm da‘vâsından [129a] zimmetini ibrâ’-i âm ile ibrâ’ ve ıskāt eyledi dedikde gıbbeˈt-tasdîk merkūm Mustafa Çelebi dahi vekîl-i mezbûr Mustafa Beşe mahzarında ikrâr ve takrîr-i kelâm edip ben dahi müvekkile-i mezbûre Safiyeˈye babamız müteveffâ-yı mezbûr cihâz nâmına verdiği eşyâdan hisse-i şer‘iyemi merkūm Safiyeˈden da‘vâ etmişdim hâlâ ben dahi eşyâ-i mezkûre da‘vâsından merkūm Safiyeˈnin zimmetini ibrâ’ edip ehadühümânın ikrârıyla husûs-ı mirasa ve gayrıya müte‘allika vechen mineˈl-vücûh da‘vâ ve nizâ ve alâka ve medhali kalmadı dedikde ba‘deˈt-tasdîk mâ vaka‘a biˈt-taleb ketb olundu. Fiˈl-yevmiˈl-işrîn min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: es-Sâbıkūn