Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 771 Hüküm no: 566 Orijinal metin no: [130b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Çelebi’nin çocuklarına vasî olan Meryem’in azl edilip yerine Osman Çelebi’nin vasî tayin edildiği Mahmiye-i Galata muzâfâtından kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden İplikçi tâifesinden Mehmed Çelebi b. el-Hâc Mehmedˈin sulbî sagīr oğlu Mustafa ve sagīre kızı Rukiyeˈnin tesviye-i emirlerine mukaddemâ kıbel-i şerʽ-i enverden mansûbe vasîleri olan Meryem bt. Mustafa emr-i vesâyeti ikâmete kādire olmayıp sagīrân-ı mezbûrânın malları zimemde kaldığından mâʽadâ eshâb-ı hukūkun hakları muʽattala kalmağla mezbûre Meryem azl ve yerine bir müstakīm ve emr-i vesâyeti ikāmete kādir kimesneden lâ-büd olmağın hâkim-i muvakkiʽ-i sadr-ı kitâb ve tûbâ-lehû ve hüsnü-meâb hazretleri mezbûre Meryemˈi azl edip yerine sadâkat ve istikāmet ile maʽrûf olan bâ’is-i hâzeˈr-rakīm yine tâife-i mezbûreden Osman Çelebi b. Haydar nâm kimesnenin sadâkati ve istikāmeti yine tâife-i mezbûrdan Nasuh Odabaşı b. Abdullah ve el-Hâc Mehmed b. Musa ve Mehmed Çelebi b. Receb ve İbrahim Beşe b. Ömer ve İsmail Çelebi b. Cafer ve Mehmed Çelebi b. Derviş nâm kimesneler hâkim-i müşârün-ileyhe haber verdiklerinden sonra hâkim-i muvakkiʽ ol dahi mezbûr Osman Çelebiˈyi minvâl-i muharrer üzere sagīrân-ı mezbûrânın tesviye-i emirlerine vasî nasb ve taʽyîn ettikde ol dahi vesâyet-i mezbûreyi kabûl ve hizmet-i lâzımesin edâya müteʽahhid olmağın mâ vakaʽa biˈt-taleb ketb olundu. Fî-gurret-i Cumâdelûlâ li-sene hamse ve semânîn ve elf. Şuhûdüˈl-hâl: Ömer Efendi b. Ali, Fahrüˈl-müderrisîn Hasan Çelebi b. İshak, Mahmud Çelebi b. el-Hâc Mehmed, İsmail Çelebi b. Cafer, Hasan Çelebi b. Ali, el-Hâc Mehmed b. Hasan, Ahmed Beşe b. Osman, İsa Beşe b. Halil, Mehmed b. Ali