Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 771 Hüküm no: 567 Orijinal metin no: [130b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Kapudan’ın, varissiz ölen Kemanî Hasan Kapudan’ın zimmetindeki alacağını beytülmal emininden talep ettiği İşbu râfiʽüˈr-rakīm Mustafa Kapudan b. Abdullah meclis-i şerʽ-i şerîfde mahmiye-i Galata ve tevâbiʽi emîn-i beytü’l-mâl olan Mehmed Ağa b. Ali mahzarında üzerine daʽvâ ve takrîr-i kelâm edip mahmiye-i mezbûre muzâfâtından kasaba-i Kasımpaşaˈda Çatma Mescid mahallesinde sâkin iken bundan akdem vefât eden Kemânî Hasan Kapudan b. Hüseyin nâm kimesne zimmetinde cihet-i karzdan üç yüz otuz esedî guruş hakkımın iki yüz esedî guruşu hakkımı kableˈl-istifâ mezbûrun hayatında yedinden kabz edip bâkī yüz otuz esedî guruş hakkımı kableˈl-istifâ fevt olup hâl-i hayatında meblağ-ı bâkī-i mezbûru bana deyni olduğunu alâ-ruûsiˈl-işhâd ikrâr ve işhâd dahi etmişken hâlâ emîn-i mezbûr imtinâʽ eder suâl olunsun dedikde gıbbeˈs-suâl ve akībeˈl-inkâr ve baʽde talebiˈl-beyyine udûl-ı ricâlden Mehmed Çelebi b. Mustafa ve Ali Çelebi b. İsmail nâm kimesneler li-ecliˈş-şehâde meclis-i şerʽa hâzırân olup isreˈl-istişhâd fiˈl-hakīka müteveffâ-yı mezbûr hayatında müddeʽî-i mezbûre bâkī yüzotuz esedî guruş zimmetimde deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde baʽdeˈt-taʽdîl veˈt-tezkiye şehâdetleri makbûle oldukdan sonra müddeʽî-i mezbûr aleˈl-vechiˈl-meşrûʽ tahlîfden sonra mûcebiyle hükm birle mâ vakaʽa biˈt-taleb ketb olundu. Fiˈl-yevmiˈs-sâlis min-Cumâdelûlâ li-sene hamse ve semânîn ve elf. Şuhûdüˈl-hâl: İsmail Çelebi b. Veli, Mustafa Ağa b. Hızır, Mahmud Çelebi b. Mehmed, Molla İbrahim, Ömer Efendi, Hüseyin Çelebi b. Ali