Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 772 Hüküm no: 568 Orijinal metin no: [131a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî Mehmed’in, merhum Mehmed b. Osman’ın evini borçları sebebiyle Hamdullah Efendi’ye sattığı Mahmiye-i Galata muzâfâtından kasaba-i İstinyeˈde Kürkçübaşı nâm mahallesinde sâkin iken bundan akdem Boğdan vilâyetinde vefât eden el-Hâc Mehmed b. Osman nâm kimesnenin düyûnu terekesinden ezyed olmağla terekesine kıbel-i şerʽden kayyım nasb ve taʽyîn olunan el-Hâc Mehmed b. Ömer meclis-i şerʽde hâlâ mahmiye-i İstanbulˈda saray-ı sultânîde imâm-ı teberdârân olan zahrüˈl-eimmetiˈl-kirâm Hamdullah Efendi b. Mehmed tarafından husûs-ı câ’iˈz-zikre vekîl olup nehc-i muʽteber üzere şerʽan vekâleti sâbite olan el-Hâc Mehmed Efendi b. Abdurrahman Efendi mahzarında biˈl-vesâye ikrâr ve takrîr-i kelâm edip müteveffâ-yı mezbûrun tereke-i menkūlesi düyûn-ı müsbetesine vefâ etmemekle mahalle-i mezbûrede vâkiʽ iki tarafdan mûmâ-ileyh Hamdullah Efendi mülküne ve bir tarafdan el-Hâc Ali mülküne ve bir tarafdan tarîk-i âmma müntehî üç bâb fevkānî oda ve bir matbah ve tahtında bir oda ve kenîfi ve tahtında bir matbah ve bi’r-i mâ’ı ve bir mikdâr bağçeyi müştemil mülk menzili dahi zarûret-i düyûn-ı müsbete içün beyʽ olunması lâzım gelmeğin menzil-i mezbûru hâssa münâdîlerden el-Hâc Mustafa b. Bayram yediyle altmış gün beyneˈt-tâlibîn sûk-ı sultânîde ve kasaba-i mezbûrede vesâir mecmaʽ-ı nâs olan mevâziʽde nidâ ve müzâyede olunup baʽde inkıtâ‘ı’r-rağbe otuz altı bin akçede karâr ve ziyâde ile tâlib-i âhar olmamağla merkūm Hamdullah Efendi dahi dört bin akçe ziyâde etmekle cemʽan kırk bin akçede mezbûr Hamdullah Efendi üzerinde karâr ve meblağ-ı mezbûr kırk bin akçe menzil-i mezbûrun semen-i misli olduğunu zeyl-i vesîkada isimleri muharrer olan Müslimîn haber verdiklerinden sonra menzil-i mezbûr cemîʽ tevâbiʽle meblağ-ı mezbûr kırk [bin] akçeye vesâyetim hasebiyle biˈl-izniˈş-şerʽî müşârün-ileyh Hamdullah Efendiˈye bi-safkatin vâhidetin beyʽ-i bâtt-ı sahîh-i şerʽî ile beyʽ ve teslîm edip ol dahi baʽdeˈl-iştirâ veˈt-tesellüm semeni olan meblağ-ı mezbûr kırk bin akçeyi biˈl-vesâye mûmâ-ileyh Hamdullah Efendi yedinden biˈt-tamam ahz u kabz eyledim baʽdeˈl-yevm menzil-i mezbûr mûmâ-ileyh Hamdullah Efendiˈnin mülk-i müşterâsıdır hasbemâ’ yeşâ’ mutasarrıf olsun dedikde gıbbeˈt-tasdîkiˈş-şerʽî mâ vakaʽa biˈt-taleb ketb olundu. Fiˈs-sânî veˈl-işrîn li-sene hamse ve semânîn ve elf. Şuhûdüˈl-hâl: Mehmed Efendi vekîl-i imâm Çelebi, Abdi Kapudan b. Ali, el-Hâc Mustafa b. el-Hâc Ali, diğer el-Hâc Mustafa b. Osman, el-Hâc Ahmed b. Mehmed, Osman Ağa b. Ramazan, İbrahim Efendi b. Mustafa, Ali Çelebi b. İbrahim, el-Hâc Hüseyin b. Hasan, Mustafa Efendi b. Hızır, Ömer Efendi b. Ali