Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 773 Hüküm no: 570 Orijinal metin no: [131a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kaymak Mehmed Kapudan’ın varislerinin, terekenin satılıp borçların ödenmesi ve kalan paranın hisse sahiblerine ödenmesi için Ramazan Çelebi’yi vekil tayin ettikleri Husûs-ı âtiˈl-beyânın mahâllinde tahrîri iltimâs olunmağın kıbel-i şerʽden Mevlânâ el-Hâc Mehmed Efendi b. Hasan Efendi irsâl olunup ol dahi mahmiye-i Galata hâricinde Şahkulu mahallesinde sâkin iken bundan akdem vefât eden Kaymak Mehmed Kapudan b. Rıdvanˈın menziline varıp zeyl-i rakīmde mastûrüˈl-esâmî olan Müslimîn huzûrlarında akd-i meclis-i şerʽ-i şerîf eyledikde müteveffâ-yı mezbûrun verâseti zevce-i metrûkesi Âişe Hanım bt. Mehmed Kapudan ile vâlidesi Hadîce bt. Hasan nâm hatuna münhasıra olduğu şerʽan zâhir ve müteʽayyin oldukdan sonra mezbûre Hadîce Hatun asâleten ve mezbûre Âişe Hanım tarafından husûs-ı âtîye vekîl olup mezbûre Âişe Hanımˈın zâtını maʽrifet-i şerʽle ârifân olan Halil Beşe b. Hasan ve Dilaver b. Abdullah şehâdetleriyle şerʽan vekâleti sâbite olan el-Hâc Hüseyin b. Memi meclis-i maʽkūd-ı mezbûrda işbu bâʽisüˈl-vesîka Ramazan Çelebi b. Yusuf mahzarında her biri asâleten ve vekâleten ikrâr ve takrîr-i kelâm edip mûrisimiz müteveffâ-yı mezbûrun zimem-i nâsda [131b] olan mâlını kabz ve tereke-i menkūlesinin ve emlâkini ve sefînelerin ve esirlerin âhara semen-i misilleriyle beyʽ ve kabz-ı semen ettikden sonra semen-i mezbûrdan müteveffâ-yı merkūmun düyûn-ı müsbetesini baʽdeˈl-edâ fazla kalırsa bize teslîme tarafımızdan merkūm Ramazan Çelebiˈyi vekîl nasb ve taʽyîn ol dahi kabûlüˈl-vekâle vech-i meşrûh üzere müteveffâ-yı mezbûrun ber-mûceb-i defter-i kassâm-ı askerî zimem-i nâsda olan mâlını kabz ve tereke-i menkūlesini ve emlâk ve sefîne ve esirlerini semen-i misilleriyle âhara beyʽ ve cemʽan dokuz bin iki yüz elli altı buçuk esedî guruşa bâliğ oldukdan sonra mezbûr Ramazan Çelebi biˈl-vekâle meblağ-ı mezbûr dokuz bin elli altı buçuk esedî guruşu kabz edip baʽde defter-i kassâm-ı askerî nâtık olduğu üzere meblağ-ı mezbûru ashâb-ı hukūk haklarını huzûr-ı hâkimde baʽdeˈl-isbât veˈt-tahlîf mezbûr Ramazan Çelebi vekâleti hasebiyle her birine yedinde olan maldan haklarını edâ ve teslîm etmekle makbûz olan meblağ-ı mezbûr dokuz bin iki yüz elli altı buçuk esedî guruşdan mezbûr Ramazan Çelebi yedinde bir akçe ve bir habbe hakkım kalmadı dediklerinde gıbbeˈt-tasdîkiˈş-şerʽî vâkiʽ hâli mevlânâ-yı mezbûr mahâllinde baʽdehû maʽan irsâl olunan İsa Bey b. Halil ve Hüseyin Çelebi b. Ali ile meclis-i şerʽa gelip alâ-vukū‘ihî inhâ [ve] takrîr etmeğin mâ vakaʽa biˈt-taleb ketb olundu. Fiˈs-sâmin-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: es-Seyyid Mehmed Efendi b. Mustafa, es-Seyyid Hasan Çelebi b. Osman, Ahmed Efendi b. Mustafa el-imâm, Mehmed Çelebi el-müezzin, el-Hâc Hasan Efendi b. Abdülgaffar, Mehmed Beşe b. Murad, Mehmed Kapudan b. Muslı Kapudan, Sinan Reis b. Mehmed, el-Hâc Mehmed b. el-Hâc Selim, Süleyman Kapudan b. Abdullah