Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 774 Hüküm no: 571 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, kocası merhum Sarı Cafer Kapudan’ın zimmetindeki mehrini beytülmal emininden talep ettiği Mahmiye-i Galataˈda Câmi‘-i Kebîr mahallesinde sâkin iken bundan akdem vefât eden Sarı Cafer Kapudan b. Abdullahˈın zevce-i metrûkesi Hadîce bt. Abdullah nâm hatundan gayrı zâhirde vâris-i maʽrûfu olmamağla terekesinin rubʽı mezbûre Hadiceˈye ve selâse-i erbâʽı cânib-i beytü’l-mâle isâbet ettiği şerʽan zâhir ve müteʽayyin oldukdan sonra işbu bâʽisüˈl-vesîka mezbûre Hadîce meclis-i şerʽde mahmiye-i mezbûre ve tevâbiʽinde yeniçeri beytü’l-mâl emini olan Mustafa Ağa tarafından husûs-ı âtîye vekîl-i müsecceli olup muhallefât-ı müteveffâ-yı mezbûre vâziʽüˈl-yed olan Hasan Çelebi b. Mehmed mahzarında üzerine daʽvâ ve takrîr-i kelâm edip zevcim müteveffâ-yı mezbûrun zimmetinde maʽkūdün-aleyh olan beş yüz esedî guruş mehr-i müeccelimi ahz u istifâ etmezden mukaddem vefât etmekle terekesinden taleb ederim suâl olunsun dedikde gıbbeˈs-suâl veˈl-inkâr müddeʽiyye-i mezbûre müddeʽâsına beyyine taleb olundukda udûl-ı Müslimînˈden olup mahalle-i mezbûrede sâkin el-Hâc Abdullah Çelebi b. el-Hâc Yahya ve Mustafa b. Himmet nâm kimesneler li-ecliˈş-şehâde meclis-i şerʽa hâzırân olup istişhâd olundukda fiˈl-hakīka müddeʽiyye-i mezbûre Hadîce beş yüz esedî guruş mehr-i müeccel üzerine bizim huzûrumuzda nefsini müteveffâ-yı mezbûre tezvîc ol dahi tezevvüc eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde isre-riʽâyet-i şerâ’itiˈl-kabûl şehâdetleri makbûle oldukdan sonra müddeʽiyye-i mezbûre aleˈl-vechiˈl-meşrûʽ tahlîfden sonra mûcebiyle hüküm birle mâ vakaʽa biˈt-taleb ketb olundu. Fiˈl-yevmiˈl-işrîn min-Saferiˈl-hayr li-sene hamse ve semânîn ve elf. Şuhûdüˈl-hâl: el-Hâc Ali b. Mehmed, Abdünnebi Beşe b. Mehmed, el-Hâc Mustafa b. el-Hâc Ali, Mustafa Ağa b. Hızır, Yusuf b. Abdullah, Mehmed Kapudan b. Muslı Kapudan, Ali Beşe b. Mustafa, Ali Beşe b. Halil, Hüseyin Kapudan b. Ali, Hüseyin Çelebi b. Ali