Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 775 Hüküm no: 572 Orijinal metin no: [132a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi’nin, merhum Mehmed Çelebi’nin zimmetindeki alacağını vasîden talep ettiği İşbu râfiʽüˈr-rakīm İsmail Çelebi b. Mustafa meclis-i şerʽ-i şerîfde mahmiye-i Galataˈda kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin sagīr oğlu Mustafa ve sagīre kızı Rukiyeˈnin tesviye-i emirlerine kıbel-i şerʽden mansûbe vasîleri olan ceddeleri Meryem bt. Mustafa mahzarında üzerine daʽvâ ve takrîr-i kelâm edip müteveffâ-yı mezbûrun zimmetinde cihet-i karzdan yüz yirmi esedî guruş hakkım olup meblağ-ı mezbûru kableˈl-ahz fevt olup hâl-i hayatında meblağ-ı mezbûr bana deyni olduğunu huzûr-ı Müslimînˈde ikrâr ve işhâd dahi etmekle hâlâ terekesinden taleb ederim vasî-i mezbûra suâl olunsun dedikde gıbbeˈs-suâl veˈl-inkâr baʽde talebiˈl-beyyine udûl-ı Müslimînˈden olup mahmiye-i mezbûrede mahallesinde sâkin Ömer b. Ali ve Hacı Hasan mahallesinde sâkin Osman Çelebi b. Habib li-ecliˈş-şehâde meclis-i şerʽa hâzırân olup isreˈl-istişhâd fiˈl-hakīka müteveffâ-yı mezbûr hayatında müddeʽî-i mezbûra karzdan yüz yirmi guruş deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde baʽdeˈt-taʽdîl veˈt-tezkiye şehâdetleri makbûle oldukdan sonra müddeʽî-i mezbûr baʽdeˈt-tahlîf mûcebiyle hüküm birle mâ vakaʽa biˈt-taleb ketb olundu. Fiˈs-sânî veˈl-işrîn min-Saferiˈl-hayr li-sene hamse ve semânîn ve elf. Şuhûdüˈl-hâl: Abdülkerim Efendi b. Rasûl, Bayram Efendi el-imâm, Hasan Çelebi İplikçi, İsa Bey b. Halil