Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 776 Hüküm no: 573 Orijinal metin no: [132a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in, merhum Mehmed Çelebi’nin zimmetindeki çuka ve atlas bahasından olan alacağını vasîden talep ettiği Çukacılar tâifesinden işbu bâʽisüˈl-kitâb el-Hâc Ali b. Mehmed meclis-i şerʽde mahmiye-i Galataˈya tâbiʽ kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. Mehmedˈin sagīr oğlu Mustafa ve sagīre kızı Rukiyeˈnin tesviye-i emirlerine kıbel-i şerʽden mansûbe vasîleri olan ceddeleri Meryem bt. Mustafa mahzarında üzerine daʽvâ ve takrîr edip müteveffâ-yı mezbûr zimmetinde yedimden müşterâ ve makbûz dört zirâʽ zümrüdî çuka ve iki buçuk zirâʽ al atlas bahâlarından cemʽan on dokuz guruş hakkım olup meblağ-ı mezbûrun iki guruş bir rubʽını alıp bâkī on altı guruş üç rubʽ hakkı kableˈl-istifâ fevt olup hâlâ terekesinden taleb ederim suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden Mahmud Çelebi b. el-Hâc Mehmed ve Ömer Çelebi b. Süleyman meclis-i şerʽa li-ecliˈş-şehâde hâzırân olup istişhâd olunduklarında fiˈl-vâkiʽ müteveffâ-yı mezbûrun [beyʻ] olunan dört ziraʽ çuka ve iki zirâʽ al atlas cemʽan on dokuz guruşa huzûrumuzda iştirâ eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde isre-riʽâyet-i şerâ’itiˈl-kabûl şehâdetleri makbûle oldukdan sonra müddeʽî-i mezbûra baʽdeˈt-tahlîf mûcebiyle hüküm birle mâ vakaʽa biˈt-taleb ketb olundu. Fiˈs-sânî veˈl-işrîn min-Safer li-sene hamse ve semânîn ve elf. Şuhûdüˈl-hâl: Mâ-sebak