Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 778 Hüküm no: 575 Orijinal metin no: [132b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Mehmed’in, merhum Mehmed Çelebi’nin zimmetindeki alacağını vasîden talep ettiği İşbu râfiʽüˈl-vesîka Râbia bt. el-Hâc Mehmed meclis-i şerʽ-i hatîrde mahmiye-i Galataˈya tâbiʽ kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin sagīr oğlu Mustafa ve sagīre kızı Rukiyeˈnin tesviye-i emirlerine kıbel-i şerʽden mansûbe vasîleri olan ceddeleri Meryem bt. Mustafa mahzarında üzerine daʽvâ ve takrîr-i kelâm edip müteveffâ-yı mezbûr zimmetinde karzdan yüz seksen iki esedî guruş hakkım olup meblağ-ı mezbûru kableˈl-istifâ vefât edip hâl-i hayatında meblağ-ı mezbûr zimmetinde bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ terekesine vâziʽatüˈl-yed olan vasî-i mezbûreden taleb ederim suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden Hüseyin b. Ahmed ve Hasan b. Ahmed li-ecliˈş-şehâde meclis-i şerʽa hâzırân olup istişhâd olunduklarında fiˈl-hakīka müteveffâ-yı mezbûr hayatında vech-i muharrer üzere müddeʽiyye-i mezbûreye karzdan yüz seksen iki esedî guruş zimmetimde deynimdir deyü huzûrumuzda ikrâr ve bizi işhâd dahi eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde isre-riʽâyet-i şerâ’itiˈl-kabûl şehâdetleri makbûle oldukdan sonra müddeʽiyye-i mezbûre baʽdeˈt-tahlîf mûcebiyle hüküm birle mâ vakaʽa biˈt-taleb ketb olundu. Min-Saferiˈl-hayr li-sene hamse ve semânîn ve elf. Şuhûdüˈl-hâl: Abdülkerim Efendi b. Rasûl, Behram Efendi el-imâm, Ahmed Ağa b. Ali, Ömer Efendi, Ali Bey