Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 779 Hüküm no: 577 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Beşe’nin, merhum Mustafa Kapudan’ın zimmetindeki alacağını vasîden talep ettiği İşbu bâʽisüˈl-vesîka Abdullah Beşe b. Abdullah meclis-i şerʽ-i hatîrde mahmiye-i Galata muzâfâtından kasaba-i Kasımpaşaˈda el-Hâc Hasan mahallesinde sâkin olup işbu sene-i mübârekede tarîk-i hâcc-ı şerîfde vefât [eden] el-Hâc Mustafa Kapudan b. İbrahimˈin sulbiye sagīre [kızı] Âişe ve sagīr oğlu Mustafa Çelebiˈnin vasî-i muhtârları olup tereke-i müteveffâ-yı mezbûre biˈl-vesâye vâziʽüˈl-yed olan İsmail Çelebi b. Veli mahzarında üzerine daʽvâ ve takrîr-i kelâm edip müteveffâ-yı mezbûra ikrâz ve teslim ol dahi istikrâz ve kabz ettiği yüz yirmi esedî guruşu kableˈl-ahz veˈl-istifâ fevt olup hâl-i hayatında meblağ-ı mezbûr bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ terekesine vâziʽüˈl-yed olan vasî-i mezbûrdan taleb ederim suâl olunsun dedikde gıbbeˈs-suâl vasî-i mezbûr cevâbında tereke-i müteveffâ-yı mezbûra biˈl-vesâye vazʽ-ı yedini ikrâr lâkin deyn-i mezbûru inkâr edicek müddeʽî-i mezbûrdan müddeʽâsına beyyine taleb olundukda udûl-ı ricâlden el-Hâc İbrahim b. Mustafa ve el-Hâc Hüseyin b. İbrahim li-ecliˈş-şehâde meclis-i şerʽa hâzırân olup isreˈl-istişhâd fiˈl-vâkiʽ müteveffâ-yı mezbûr hayatında mezbûr Abdullahˈdan yüz yirmi esedî guruş istikrâz ve kabz edip hâlâ deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde baʽde riʽâyet-i şerâʽitiˈl-kabûl şehâdetleri makbûle oldukdan sonra müddeʽî-i mezbûr baʽdeˈt-tahlîf mûcebiyle hüküm birle mâ-vakaʽa biˈt-taleb ketb olundu. Fiˈl-yevmiˈs-sâlis veˈl-işrîn min-şehri Rebîʽiˈl-âhir li-sene hamse ve semânîn ve elf. Şuhûdüˈl-hâl: Ömer Efendi b. Ali, Hasan Çelebi b. İshak, Hüseyin Çelebi b. Ali, Ali Bey b. Halil, Veli Çelebi b. Mehmed