Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 780 Hüküm no: 578 Orijinal metin no: [133a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî İsmail Çelebi’nin, merhum Mustafa Kapudan’ın Abdullah b. Abdullah’taki alacaklarını tahsil ettiği Mahmiye-i Galata tevâbiʽinden kasaba-i Kasımpaşaˈda el-Hâc Hasan mahallesinde olup işbu sene-i mübârekede hâcc-ı şerîfde vefât eden el-Hâc Mustafa Kapudan b. İbrahimˈin sulbî sagīr oğlu Mustafa Çelebi ve sulbiye sagīre kızı Âişeˈnin tesviye-i emirlerine vasî-i muhtârları olan İsmail Çelebi b. Veli meclis-i şerʽ-i şerîfde zikri câ’î meblağa vâziʽüˈl-yed olan müteveffâ-yı mezbûrun muʽtakı Abdullah b. Abdullah mahzarında biˈl-vesâye ikrâr ve takrîr-i kelâm edip müteveffâ-yı mezbûrun Şâm-ı şerîfde emânet vazʽ ettiği üç at ve bir akreb sâʽat ve nakid ve baʽzı eşyâ semenleri cemʽan iki yüz kırk sekiz esedî guruşa bâliğ oldukdan sonra mezbûr Abdullah meblağ-ı mezbûru baʽdeˈl-kabz yine Şâm-ı şerîfde Hazînedârı İbrahim Ağa nâm kimesne müteveffâ-yı mezbûra ikrâz ve teslîm ettiği otuz beş yaldız altını ki bi-hesâb-ı guruş seksen yedi buçuk esedî guruşu mezbûr Abdullah kendinin ikrâz ve teslîm ettiği yüz yirmi guruşu huzûr-ı hâkimde baʽdeˈl-isbât veˈt-tahlîf meblağ-ı mezbûr iki yüz kırk sekiz guruşdan baʽdeˈl-ahz veˈl-istifâ altı guruş dahi müteveffâ-yı mezbûrun atlarının çayır bahâsına verip merkūm Abdullahˈın yedine bâkī kalan otuz beş esedî guruşu dahi hâlâ ben vesâyetim hasebiyle [133b] mezkûr Abdullah yedinden ahz u kabz ve istifâ edip mezbûr Abdullah Beşe yedinden müteveffâ-yı mezbûr mâlından bir akçe ve bir habbe bâkī kalmadı dedikde gıbbeˈt-tasdîkiˈş-şerʽî mâ vakaʽa biˈt-taleb ketb olundu. Fiˈl-yevmiˈl-hâmis veˈl-işrîn min-şehri Rebîʽiˈl-âhir li-sene hamse ve semânîn ve elf. Şuhûdüˈl-hâl: es-Sâbıkūn