Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 780 Hüküm no: 579 Orijinal metin no: [133b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Handan bt. Abdullah’ın, merhum Mustafa Kapudan’ın azatlı cariyesi olduğundan varislerin kölelik taleplerinin reddedildiği İşbu orta boylu, açık kaşlı, gök elâ gözlü, Rusiyyetüˈl-asl hâmiletü hâzeˈl-kitâb Handan bt. Abdullah meclis-i şerʽ-i şerîfde mahmiye-i Galata tevâbiʽinden kasaba-i Kasımpaşaˈda el-Hâc Hasan mahallesinde sâkin iken tarîk-i hacda vefât eden el-Hâc Mustafa Kapudan b. İbrahimˈin zevce-i metrûkesi Rahime bt. Veli ile sulbî sagīr oğlu Mustafa Çelebiˈnin vasî-i muhtârı olan İsmail Çelebi b. Veli mahzarlarında üzerlerine daʽvâ ve takrîr-i kelâm edip ben müteveffâ-yı mezbûrun câriye-i memlûkesi olup mülkünde olduğum hâlde medîne-i mezbûrede mülkünden ihrâç edip iʽtâk etmişken ve Müslimîn? etmişken hâlâ mezbûrân bana rık olmak üzere vazʽ-ı yed murâd ederler suâl olunup sebîlim tahliye olunması matlûbumdur dedikde gıbbeˈs-suâl ve akībeˈl-inkâr müddeʽiyye-i mezbûreden müddeʽâsına beyyine taleb olundukda udûl-ı ricâlden ve hüccâc-ı zeviˈl-ibtihâcdan el-Hâc İbrahim Çelebi b. Mustafa ve el-Hâc Abdullah b. Abdullah nâm kimesneler li-ecliˈş-şehâde meclis-i şerʽa hâzırân olup isreˈl-istişhâd fiˈl-hakīka müteveffâ-yı mezbûr el-Hâc Mustafa Kapudanˈın hâl-i hayatında ve kelâm-i akl-ı sıhhatinde Medîne-i Münevvereˈde Ravza-i Mutahharaˈda bizim huzûrumuzda câriye-i memlûkesi işbu Handanˈı hasbeten lillâh-i teʽâlâ mâlından ifrâz edip tahrîr ve iʽtâk ve zümre-i harâire ilhâk eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde baʽdeˈt-taʽdîl veˈt-tezkiye şehâdetleri makbûle oldukdan sonra mûcebiyle mezbûre Handanˈın ıtkına baʽdeˈl-hükm mâ vakaʽa biˈt-taleb ketb olundu. Fiˈl-yevmiˈs-sâlis veˈl-işrîn min-şehri Rebîʽiˈl-âhir li-sene hamse ve semânîn ve elf. Şuhûdüˈl-hâl: Süleyman Efendi b. Mehmed el-imâm, Mehmed Halîfe b. Abdullah, Mustafa Çelebi b. Hüseyin el-kâtib, el-Hâc Mahmud Beşe b. el-Hâc Şa‘bân, el-Hâc İbrahim b. Ali, Ebûbekir Kapudan b. Ömer, Abdi Çelebi b. Hüsameddin, Veli Çelebi tâbiʽ-i kassâm efendi, Ali b. Abdullah, Ahmed b. Mehmed