Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 782 Hüküm no: 581 Orijinal metin no: [134a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muammere ve Mülayim’in, merhum Mustafa Beşe’nin diğer hanımları olup terekeden mehir ve hisselerinin vasîden alınıp verilmesini talep ettikleri Mahmiye-i İstanbulˈda Kaliçeci Hasan mahallesinde sâkin iken bundan akdem vefât eden el-Hâc Mustafa Beşe b. Ahmedˈin verâseti zevce-i metrûkeleri Muammere bt. Abdullah ve Müslime bt. Abdullah ve Mülâyim bt. Abdullah nâm hatunlar ile sulbiye sagīre kızları Arzi ve Döndü ve Râbiaˈya ve li-ebeveyn ammi oğlu Receb b. Mehmedˈe münhasıra olup kableˈl-kısme mezbûre Râbia fevt olup verâseti anası mezbûre Müslimeˈye ve li-eb kız karındaşları sagīretân-ı mezbûretân Döndü ve Arzi ile merkūm Receb’e münhasıra olup kableˈl-kısme mezbûre Döndü dahi vefât edip verâseti vâlidesi merkūme Muammere ile li-eb kız karındaşı merkūme Arziˈye ve mezkûr Recebˈe münhasıra olduğu şerʽan zâhir ve tashih-i mes’eleleri bi-hükmiˈl-münâsahatiˈş-şerʽiyye altı yüz kırk sekiz sehimden iʽtibâr olunup sihâm-ı mezbûreden doksan bir sehmi mezkûre Muʽammere ve elli bir sehmi mezbûre Müslimeˈye ve yirmi yedisehmi mezkûre Mülâyimˈe ve iki yüz seksen sekiz sehmi sagīre-i mezbûre Arziˈye mezbûr doksan bir sehmi mezbûre Arzi’ye isâbet eylediği zâhir ve müteʽayyin oldukdan sonra işbu bâʽiseiˈl-kitâb mezbûretân Muammere ve Mülâyim meclis-i şerʽde sagīre-i mezbûre Arziˈnin tesviye-i emrine kıbel-i şerʽden mansûb vasîsi olan Hüseyin Bey b. Veli ile merkūme Müslime ve mezkûr Receb mahzarlarında üzerlerine daʽvâ ve takrîr-i kelâm edip biz müteveffâ-yı mezbûr el-Hâc Mustafaˈnın câriye-i memlûkeleri olup mülkünde olduğum hâlde hayat ve kemâl-i sıhhatinde mâlından ifrâz edip tahrîr ve iʽtâk eyledikden sonra beşer yüz akçe mehr-i müeccel üzerine bizi tezevvüc edip biz dahi nefsimizi tezvîc etmişken hâlâ mezbûrdan müteveffâ-yı mezbûre iʽtâk edip mukaddem tezevvüc etmişidi hâlâ siz mirasdan mahrûmsuz deyü hissemize isâbet eden hakkımızı vermede taʽallül ederler suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden olup mahmiye-i mezbûrede Sarı İshak mahallesinde sâkin Fazlullah Çelebi b. el-Hâc Mustafa ve el-Hâc Muhyiddin mahallesinde sâkin İsmail Çelebi b. eş-Şeyh Ali nâm kimesneler li-ecliˈş-şehâde meclis-i şerʽa hâzırân olup eserüˈl-istişhâd fiˈl-vâkiʽ müteveffâ-yı mezbûr hayatında mezbûretânı baʽdeˈl-ıtk beşer yüz akçe mehr-i müeccel tesmiyesiyle tezevvüc ve kabûl eyledim deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde şâhidân-ı mezbûrânın mahallelerinden tereke içün kıbel-i şerʽden Mevlânâ Hasan Efendi irsâl olunup ol dahi şâhid-i mezbûr Fazlullah Çelebiˈnin mahallesine varıp mezkûrûn-ı mesfûrûnun? ve Müslime ve Receb muvâcehelerinde tefahhus eyledikde mahalle-i mezbûre ahâlîsinden ve Mehmed Efendi b. Sefer, Hasan Bey b. Ali ve Mustafa Beşe b. Hüseyin ve Mehmed Beşe b. Ömer nâm kimesneleri ve mezbûr İsmail Çelebiˈnin mahallesine varıp kezâlik mezbûrûn muvâcehelerinde suâl eyledikde zikrolan Hacı Muhyiddin, Mehmed b. Ahmed Efendi el-imâm, Mustafa b. Mehmed, Osman Beşe b. Mehmed, Mehmed b. Abdullah, Ahmed Efendi b. Abdülkadir el-imâm, Mustafa b. Abdullah, Süleyman b. Mehmed nâm kimesneler şâhidân-ı mezbûrân adl ve makbûlüˈş-şehâde kimesnelerdir deyü haberleri mevlânâ-yı mezbûr mahâllinde tahrîr ve maʽan irsâl olunan Ahmed b. Osman ile meclis-i şerʽa gelip vukûʽı üzere inhâ ettikden sonra mûcebiyle hüküm birle mâ vakaʽa biˈt-taleb ketb olundu. Fiˈl-yevmiˈs-sâlis min-Cumâdelûlâ li-sene hamse ve semânîn ve elf. Şuhûdüˈl-hâl: Yusuf Ağa b. Haseki el-mübâşir, Hüseyin Bey b. Mahmud, Davud Beşe b. Ali, Cafer Efendi b. Veli, Ali b. Mehmed, Ömer Efendi b. Ali, Hasan Efendi b. Seyfullah, İsa Beşe b. Halil, Hüseyin Çelebi b. Ali, Ahmed b. Osman