Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 790 Hüküm no: 584 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un, kocası merhum Mustafa Kapudan’ın vasîsi İsmail Çelebi’yle tereke gelirleri konusunda ibralaştıkları Mahmiye-i Galata muzâfâtından kasaba-i Kasımpaşaˈda el-Hâc Hasan mahallesinden olup işbu sene-i mübârekede tarîk-i hâcc-ı şerîfde takdîr-i Rabbânî ile âzim-i dâr-ı bekā eden el-Hâc Mustafa Kapudan b. İbrahimˈin zevce-i metrûkesi Rahime Hatun bt. Veli meclis-i şer‘-i hatîrde müteveffâ-yı mezbûrun hayatında hâcc-ı şerîfe teveccüh ettiğinde vekîl-i mutlak ittihâz ettiği işbu sahibüˈl-vesîka İsmail Çelebi b. Veli mahzarında ikrâr ve takrîr-i kelâm edip müteveffâ-yı mezbûr hâcc-ı şerîfe teveccüh ettikde mezbûr İsmail Çelebiˈyi tarafından her husûsda vekâlet-i mutlaka-i âmme ile vekîl etmekle ol dahi biˈl-vekâle bin seksen dört senesi şehri Recebüˈl-ferdin gurresinde nmevti haberi geldiği bin seksen beş senesi Saferüˈl-hayrı gāyetine gelince sekiz ayda ve ba‘dehû Rebîʻülevveliˈnde iki hamamdan nâzır, dellâk ve hamal ve kayıkçılardan ve kayıklarından hâsıl olan meblağı ve ba‘zı zimem-i nâsda olan nükūddan kabz edip hâlâ beyneˈl-Müslimîn gördüğü muhâsebe defterin nâtık olduğu üzere masrûfu makbûlüm olup dokuz ayda kendi mu‘terif olduğu on üç bin üç yüz kırk dokuz akçeden gayrı yedinde müteveffâ-yı mezbûrun mâlından bir akçe ve bir habbe bâkī kalmamağla husûs-ı mezbûra müte‘allika da‘vâ ve nizâ‘ımdan mezbûr İsmail Çelebiˈnin zimmetini ibrâ’-i âm ile ibrâ’ ve ıskāt edip vechen mineˈl-vücûh ve sebeben mineˈl-esbâb husûmet ve nizâmız kalmadı dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fî-gurreti Cumâdelûlâ li-sene hamse ve semânîn ve elf. Şuhûdüˈl-hâl: Süleyman Efendi el-imâm, Mehmed Efendi b. Abdullah el-müezzin, Mustafa Çelebi b. Hüseyin el-kâtib, Abdi Çelebi b. Ahmed, Bekir Kapudan b. Ömer, el-Hâc İbrahim b. Mustafa, el-Hâc Mahmud b. el-Hâc Şa‘bân, el-Hâc İbrahim b. Ali, Mustafa Çelebi b. Hüsameddin, el-Hâc Abdullah b. Abdullah, el-Hâc İbrahim b. Abdullah, Veli Çelebi b. Ali