Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 790 Hüküm no: 585 Orijinal metin no: [135a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ve Ahmed Çelebi’nin, kız kardeşleri Safiye hakkında açtıkları tereke malının saklanması hususunda ibralaştıkları Mahmiye-i Galataˈya tâbi‘ kasaba-i Tophâneˈde Tomtom mahallesinde sâkin Mustafa Çelebi ve Ahmed Çelebi b. Ali Ağa meclis-i şer‘de işbu bâ‘isüˈl-vesîka li-ebeveyn kız karındaşı Safiye nâm hatun tarafından ikrâr-ı câ’iˈz-zikri tasdîka vekîl olup zât-ı merkūmeyi ma‘rifet-i şer‘iye ile ârifân olan Ali Çelebi b. Murtezâ ve Ahmed Çelebi b. Mehmed şehâdetleriyle şer‘an vekâleti sâbite olan Mustafa Beşe b. Murteza mahzarında her biri ikrâr ve takrîr-i kelâm edip bundan akdem kız karındaşımız müvekkile-i mezbûre Safiyeˈden babamız müteveffâ-yı mezbûr Ali Ağaˈnın cihâz nâmına verdikleri cins ve vasfı beynimizde ilm-i şer‘î ile ma‘lûm eşyâ ile anamız müteveffât Râbia bt. Yusuf nâm hatundan ba‘zı eşyâ ketm ve ihfâ etmişdik deyü da‘vâ etmiştim elhâletü hâzihî cihâz nâmına olan eşyâ-i mezbûre da‘vâlarından ve eşyâ-i mektûmeden kız karındaşım müvekkile-i merkūmun zimmetini ibrâ’-i âm ile ibrâ’ ve ıskāt edip vechen mineˈl-vücûh da‘vâ ve nizâ‘ımız kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-işrîn min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Abdullah Efendi b. Abdurrahman, Ahmed Çelebi b. Mehmed, es-Seyyid Mehmed Çelebi b. es-Seyyid Nuh, Ali Beşe el-mübâşir, Hüseyin Bey b. Ali, Kasabzâde Ahmed Çelebi b. ( )