Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 791 Hüküm no: 586 Orijinal metin no: [135a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah’ın, merhume Mâhî bt. Abdullah’ın azatlı cariyesi olduğundan varislerin kölelik iddialarının reddedildiği İşbu orta boylu, gök elâ gözlü, Rusiyyetüˈl-asl bâ‘isetüˈl-kitâb Belkıs bt. Abdullah meclis-i şer‘de mahmiye-i Galata hâricinde Bedreddin Bey mahallesinde sâkine iken bundan akdem vefât eden Mâhî bt. Abdullah nâm hatunun verâseti zevc-i metrûku Hüseyin Beşe b. Receb nâm kimesneden gayrı zâhirde vâris-i ma‘rûfu olmamak ile terekesinin nısfı zevc-i mezbûr Hüseyinˈe ve nısf-ı âharı cânib-i beytü’l-mâle isâbet etmekle tereke-i müteveffât-ı mezbûre biˈl-emâne vâzi‘ayiˈl-yed olan Mehmed Ağa b. Ali ile mezbûr Hüseyin mahzarlarında üzerine da‘vâ ve takrîr-i kelâm edip ben müteveffâ-yı mezbûrenin câriye-i memlûkesi olup mülkünde olduğum hâlde târih-i kitâbdan altı ay mukaddem hayatında beni tedbîr-i mutlaka [ile] müdebbere edip hâlâ vefât etmekle ve terekenin sülüsü dahi kıymetime müsâ‘id olmağla hürre olmuş iken hâlâ mezbûrân bana rık olmak üzere vaz‘-ı yed murâd ederler suâl olunup yed-i âdiyeleri üzerimden nez‘ olunup sebîlim tahliye olunması murâdımdır dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl-ı Müslimînˈden es-Seyyid Abdülgani Çelebi b. es-Seyyid Hüseyin ve Receb Efendi b. Abdülkerim nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffât-ı mezbûre târih-i kitâbdan altı ay mukaddem câriye-i mezbûre Belkısˈı bizim huzûrumuzda tedbîr-i mutlaka ile müdebber edip hâlâ [135b] vefât etmekle terekesinin sülüsü dahi mezbûre Belkısˈın kıymetine müsâ‘id olmağla mezbûre Belkıs sâir harâir gibi hurre olmuşdur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâmin min-Cumâdelûlâ li-sene hamse ve semânîn ve elf. Şuhûdüˈl-hâl: Şa‘bân Beşe b. İbrahim, el-Hâc Mahmud b. Receb, Ali Çelebi b. Bayram, Mustafa b. Hüseyin, Ali Çelebi b. Hüseyin, İsa Beşe b. Halil