Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 792 Hüküm no: 587 Orijinal metin no: [135b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mâhî bt. Abdullah’ın terekesinden beytülmala kalan yarım ev hissesinin beytülmal emini tarafından kocası Hüseyin Beşe’ye satıldığı Mahmiye-i Galata tevâbi‘inde kasaba-i Kasımpaşaˈda Bedreddin Bey mahallesinde sâkine iken bundan akdan [akdem] vefât eden Mâhî bt. Abdullah nâm hatunun zevc-i metrûku Hüseyin Beşe b. Recebˈden zâhirde vâris-i ma‘rûfu olmamağla terekesinin nısfı zevci Hüseyinˈe ve nısf-ı âharı cânib-i beytü’l-mâle râci‘ olmağla hâlâ mahmiye-i mezbûre tevâbi‘i emîn-i beytü’l-mâl olup zikri câ’î nısf-ı menzile vâzi‘uˈl-yed olan Mehmed Ağa b. Ali meclis-i şer‘de işbu bâ‘isüˈl-vesîka Hüseyin Beşe mahzarında biˈl-emâne ikrâr ve takrîr-i kelâm edip müteveffât-ı mezbûrenin mahalle-i mezbûrede vâki‘ bir tarafdan es-Seyyid Mehmed Çelebi ve es-Seyyid Mustafa Dede ve es-Seyyid İsmail Dede menzillerine ve bir tarafdan Meryem Hatun menziline ve bir tarafdan es-Seyyid Kalafatçı Musa menziline ve bir tarafdan tarîk-i âmma müntehi fevkānî üç oda ve sofayı ve tahtânî iki bâb odayı ve bi’r-i mâ’î ve eşcâr-ı müsmire ve gayr-ı müsmireyi hâvî bağçeyi ve kenîfi müştemil mülk menzilin nısfı mukaddemâ zevc-i mezbûr Hüseyin Beşeˈnin mülk-i müşterâsı olup ve nısf-ı âharı müteveffât-ı mezbûrenin mülkü olmağla hâlâ nısf-ı mezbûrun nısfı cânib-i beytü’l-mâle â’id olmağla nısf-ı menzil-i mezkûr biˈl-izniˈş-şer‘î sûk-ı sultânîde beyneˈt-tâlibîn hâssa münâdîlerden Ahmed nâm münâdî yediyle ba‘deˈn-nidâ veˈl-müzâyede beytü’l-mâle â’id olan nısf-ı menzil-i mezkûr elli guruşa mezbûr Hüseyin Beşe üzerinde karâr edip ziyâde ile tâlib-i âharı olmadığından gayrı meblağ-ı mezbûr elli guruşu nısf-ı menzil-i mezkûrun semen-i misli olduğunu sikāt ihbâr ettikden sonra biˈl-emâne nısf-ı menzil-i mezkûr Hüseyinˈe meblağ-ı mezbûr elli guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm mezbûr Hüseyin dahi ba‘deˈl-iştirâ veˈt-tesellüm semeni olan meblağ-ı mezbûr elli guruşu mezbûr Hüseyin yedinden biˈl-emâne aldım kabz eyledim ba‘deˈl-yevm menzil-i mezbûr mecmû‘ı mezbûr Hüseyinˈin ırsen ve şirâen mülk-i mahzıdır keyfe mâ yeşâ’ ve yahtâr mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈs-sâmin min-şehri Cumâdelûlâ li-sene hamse ve semânîn ve elf. Şuhûdüˈl-hâl: es-Sâbıkūn