Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 803 Hüküm no: 596 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî Osman Çelebi’nin, Murad Kapudan’a açtığı balık ağası bahasından alacak davasında haksız olduğu Mahmiye-i Galataˈya tâbi‘ kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin sagīr oğlu Mustafa ve sagīre kızı Rukiyeˈnin tesviye-i emirlerine kıbel-i şer‘den mansûb vasîleri olan Osman Çelebi b. Habib meclis-i şer‘de işbu bâ‘isüˈl-vesîka Murad Kapudan b. Abdullah mahzarında biˈl-vesâye üzerine da‘vâ ve takrîr-i kelâm edip mezbûr Murad Kapudan zimmetinde müteveffâ-yı mezbûrun yedinden müşterâ ve makbûz agrîb ta‘bîr olunur balık ağı bahâsından altı bin akçe hakkı olup kableˈl-istifâ fevt olmağla hâlâ biˈl-vesâye merkūm Murad Kapudanˈdan taleb ederim suâl olunsun dedikde gıbbeˈs-suâl Murad Kapudan cevâbında fiˈl-hakīka meblağ-ı mezbûr zimmetimde deynim olup lâkin târih-i kitâbdan on dört sene mukaddem meblağ-ı mezbûru müteveffâ-yı merkūma edâ ve teslîm etmişdim deyü def‘le mukābele edicek gıbbeˈl-istintâk veˈl-inkâr mezbûr Murad Kapudanˈdan def‘-i mezkûruna beyyine taleb olundukda kasaba-i mezbûrede Tahtakādı mahallesinde sâkin Mehmed b. Veli ve el-Hâc Hüsrev mahallesinde sâkin Yusuf b. Abdullah nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müdde‘î-i mezbûr Murad Kapudan târih-i merkūmdan müteveffâ-yı mezbûre huzûrumuzda on guruş bir def‘a ve otuz guruş bir def‘a ki cem‘an altı bin olmak üzere kırk guruşu def‘ ve teslîm eyledi biz bu husûsa şâhidleriz şehâdet dahi ederiz her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra mûcebiyle mu‘ârazadan vasî-i mezbûr men‘ olunup mâ vaka‘a biˈt-taleb ketb olundu. Fiˈs-sâmin min-Cumâdelûlâ li-sene hamse ve semânîn ve elf. Şuhûdüˈl-hâl: Ahmed Çavuş el-mübâşir, Mahmud Çelebi b. Mehmed, İsa Bey, Hüseyin b. Ali, Osman b. Ahmed