Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 807 Hüküm no: 601 Orijinal metin no: [137b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’tan varislere intikal eden ev hissesinin karısı Hatice bt. Mustafa’ya satıldığı Mahmiye-i Galata tevâbi‘inden nefs-i İstinyeˈde Kürkçübaşı mahallesinde sâkin iken bundan akdem fevt olan el-Hâc Ali b. Abdullahˈın verâseti zevce-i metrûkesi Hadîce bt. Mustafa ile sulbî oğulları Mehmedˈe ve Ahmedˈe ve sulbiye kızı Fatmaˈya münhasıra olup kableˈl-kısme mezbûr Mehmed dahi fevt olup verâseti anası mezbûre Hadîce ile li-ebeveyn karındaşları Ahmed ve Fatmaˈya münhasıra olup kableˈl-kısme mezbûre Fatma dahi fevt olup verâseti anası mezbûre ile karındaşı mezbûr Ahmedˈe münhasıra olup kableˈl-kısme mezbûr Ahmed dahi fevt olup verâseti anası mezbûre Hadîce ile babasını i‘tâk eden el-Hâc Osmanˈın oğlu el-Hâc Mehmedˈin oğlu Süleyman nâm sagīre münhasıra olduğu şer‘an zâhir ve tashih-i mes’eleleri bi-hükmiˈl-münâsahatiˈş-şer‘iye üç bin iki yüz kırk sehimden i‘tibâr olunup sihâm-ı mezbûrenin bin altı yüz yetmiş iki sehmi mezbûre Hadiceˈye ve bin beş yüz altmış sekiz sehmi mezbûr Süleymanˈa isâbet ettiği bâhir ve mütehakkık oldukdan sonra sagīr-i mezbûrun kıbel-i şer‘den mansûb vasîsi olan vâlidesi Sâliha bt. İbrahim meclis-i şer‘de işbu bâ‘isetüˈl-kitâb mezbûre Hadîce mahzarında biˈl-vesâye ikrâr ve takrîr-i kelâm edip müteveffâ-yı evvel mezbûrun ceddesi olup mahalle-i mezbûrede vâki‘ bir tarafdan el-Hâc Mehmed mülküne ve bir tarafdan Cabacıoğlu mülküne ve bir tarafdan tarîk-i âmma müntehî iki bâb fevkānî ve bir bâb tahtânî odaları ve dehliz ve bi’r-i mâ’ı Mehmed Çelebi nâm kimesne ile müşterek bir su kuyusunu müştemil olan mülk menzilin nısfını müteveffâ-yı mezbûrun ve nısf-ı âharı işbu hazır biˈl-meclis fî-zamân-ı Mustafa nâm kimesnenin mülkü olup ba‘de vefâtihî nıfsına menzil-i mezbûrda sagīr-i mezbûrun hissesine isâbet eden bin beş yüz altmış sekiz sehmi ifrâz olunmak mümkün olmayıp semen-i misline âhara bey‘ ve semeni i‘mâl olıncak sagīr-i mezbûr hakkında bir vechle evlâ olmağla biˈl-izniˈş-şer‘î biˈl-vesâyâ sagīr-i mezbûrun menzil-i mezbûrda olan bin beş yüz altmış sekiz sehim hissesini dokuz bin sekiz yüz yetmiş iki akçeye bâtten bey‘ ve teslîm ol dahi iştirâ ve tesellüm ettikden sonra semeni olan meblağ-ı mezbûru merkūme Hadîce yedinden biˈl-vesâye ahz u kabz ettim min-ba‘d nısf-ı menzil-i mezbûru mecmû‘ı ırsen ve şirâen merkūme Hadiceˈnin mülk-i sarîhidir keyfe mâ yeşâ’ mutasarrıfe olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈs-sâmin min-Cumâdelûlâ li-sene hamse ve semânîn ve elf. Şuhûdüˈl-hâl: Osman Çelebi b. el-Hâc Yusuf, Mehmed Çelebi b. Yahya, İbrahim Çelebi b. Hüseyin, İslâm Çelebi b. Ahmed, Mehmed Çelebi b. Mustafa, Mehmed Çelebi b. Rıdvan, Ahmed Beşe b. Abdullah, Osman Çelebi b. Mehmed