Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 808 Hüküm no: 602 Orijinal metin no: [137b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İbrahim’in, Ali b. Abdullah’ın varislerinden Süleyman’a vasî tayin edildiği Mahmiye-i Galata tevâbi‘inden nefs-i İstinyeˈde Kürkçübaşı mahallesinden olup bundan esbak âhar diyârda ticâret üzere iken vefât eden el-Hâc Ali b. Abdullahˈın verâseti zevce-i metrûkesi Hadîce bt. Mustafaˈya ve oğulları Mehmed ve Ahmedˈe ve kızı Fatmaˈya münhasıra olup kableˈl-kısme mezbûr Mehmed dahi fevt olup verâseti anası mezbûre Hadîce ile li-ebeveyn karındaşı Ahmedˈe ve kız karındaşı mezbûre Fatmaˈya münhasıra olup kableˈl-kısme merkūme Fatma dahi fevt olup verâseti anası mezbûre Hadîce ile karındaşı merkūme Ahmedˈe münhasıra olup kableˈl-kısme Ahmed dahi vefât edip verâseti anası mezbûre Hadîce ile babası mezbûr el-Hâc Aliˈyi i‘tâk eden el-Hâc Osmanˈın oğlu el-Hâc Mehmedˈin oğlu Süleyman nâm sagīre münhasıra olduğu şer‘an zâhir ve müte‘ayyin oldukdan sonra sagīr-i mezbûr Süleymanˈın minvâl-i muharrer üzere bi-tarîkıˈl-münâsahatiˈş-şer‘iye hisse-i şer‘iyesini hıfz ve hâlini zabta bir vasîden lâ-büd olmağla salâh ve istikāmetle ma‘rûfe olup anası olan işbu bâ‘isetüˈl-kitâb Sâliha bt. İbrahim nâm hatunun istikāmetini zeyl-i vesîkada isimleri muharrer olan Müslimîn haber vermeleriyle hâkim-i muvakki‘-i sadr-ı kitâb tûbâ-lehû hüsnü-meâb hazretleri mezbûre Sâlihaˈyı sagīre-i mezbûrun tesviye-i emrine kıbel-i şer‘den vasî nasb ve ta‘yîn ettikde mezbûre Sâliha dahi vesâyet-i mezbûreyi kabûl ve cihet-i lâzımesini edâya ta‘ahhüd etmeğin mâ-vaka‘a biˈt-taleb ketb olundu. Fiˈl-âşir min-Cumâdelûlâ li-sene hamse ve semânî ve elf. Şuhûdüˈl-hâl: Ahmed Çelebi b. el-Hâc Süleyman, Abdi Kapudan, Mehmed Efendi b. Ahmed, el-Hâc Mustafa Kadifeci, el-Hâc Mustafa b. ( ), Mehmed Çelebi b. Yahya, Mehmed b. Mustafa, İsa Beşe b. Halil, Osman Çelebi b. el-Hâc Yusuf, Ahmed b. Osman, Hüseyin Çelebi b. Ali