Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 809 Hüküm no: 603 Orijinal metin no: [138a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah’ın, merhum Mustafa’nın azatlı cariyesi olduğu Hüccet-i Itknâme İşbu orta boylu, açık kaşlı, gök elâ gözlü, Rusiyyetüˈl-asl hâmilet-i hâzeˈl-kitâb Belkıs bt. Abdullah meclis-i şer‘de mahmiye-i İstanbulˈda Kaliçeci Hasan mahallesinde sâkine iken bundan akdem vefât eden el-Hâc Mustafa b. İbrahimˈin sulbiye kızı Arzi nâm sagīrenin kıbel-i şer‘den mansûb vasîsi olan Habib Bey b. Veli mahzarında üzerine da‘vâ ve takrîr-i kelâm edip ben müteveffâ-yı mezbûrun câriye-i memlûkesi olup mülkünde olduğum hâlde hasbeten lillâh-i te‘âlâ beni hâl-i marazında tedbîr-i mutlak ile müdebbere ettiğini huzûr-ı Müslimînˈden ikrâr ve işhâd ettikden sonra vefât edip ve terekesinin sülüsü kıymetime müsâ‘id olmağla ben hür olmuş iken hâlâ vasî-i mezbûr bana rık olmak üzere vaz‘-ı yed murâd eder suâl olunup sebîlim tahliye olunması murâdımdır dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl-ı Müslimînˈden olup mahmiye-i mezbûrede Şâmî Ahmed Efendi b. Abbas ve Abdülbaki Beşe b. Hasan nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hâl-i marazında câriye-i mezbûre Belkısˈı bizim huzûrumuzda tedbîr-i mutlak ile müdebber ve bizi işhâd ettikden sonra vefât edip ve terekesinin sülüsü mezbûrenin kıymetine müsâ‘id olmağla sâir harâir gibi hürre olmuşdur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-Cumâdelûlâ li-sene hamse ve semânîn ve elf. Şuhûdüˈl-hâl: Yusuf Haseki el-mübâşir, Hüseyin Bey b. Mehmed, Abdullah b. Abbas, Dilaver Beşe b. Abdullah, Hasan Hoca b. Salih