Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 810 Hüküm no: 604 Orijinal metin no: [138a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin terekesinden varislere intikal eden çiftliğin satışı için Habib Bey’in vekil tayin edildiği Mahmiye-i Galata a‘mâlinden İstinye nâhiyesine tâbi‘ Sarıyar nâm karyede sâkine Ümmühani bt. Mehmed nâm hatunun zevci ve tarafından ikrâr-ı câ’iˈz-zikre vekîl olup mezbûrenin zâtını ma‘rifet-i şer‘iye ile ârifân olan el-Hâc Emrullah Çelebi b. Derviş ve Mustafa Çelebi b. Ali şehâdetleriyle hasm-ı câhid mahzarında vekâleti sâbite olan Zülfikar Bey b. Abdulmennan meclis-i şer‘-i hatîrde mahmiye-i İstanbulˈda Kaliçeci Hasan mahallesinde sâkin iken bundan akdem vefât eden el-Hâc Mustafa Beşe b. İbrahim nâm kimesnenin sulbiye kızı Arzi nâm sagīrenin savb-ı şer‘den mansûb vasîsi olan işbu bâ‘isüˈl-kitâb Habib Bey b. Veli mahzarında biˈl-vekâle ikrâr ve takrîr-i kelâm [edip] müvekkilem mezbûre Ümmühani Yerliköy demekle ma‘rûf karyede vâki‘ bir tarafdan Mustafa nâm kimesne mülküne ve bir tarafdan Yusuf nâm kimesne mülküne ve bir tarafdan çayıra ve bir tarafdan tarîk-i âmma müntehî çiftlik ta‘bîr olunur büyûtu müştemil mülk menzilini mukaddemâ sagīre-i mezbûrenin vasîsi Ali b. Mustafa nâm kimesne yedinde olan mâlından iştirâya ve kabz ettiği üç yüz esedî guruş mukābelesinde Ali yedine rehin vaz‘ etmişidi hâlâ meblağ-ı mezbûrun yüz guruşunu vasî-i merkūm Habib Beyˈe ba‘deˈl-edâ bâkī iki yüz guruşa bana çiftlik-i mezkûrîni hâlâ vasî olan mezbûr Habib semeniyle bey‘ ve teslîm ol dahi biˈl-vesâye bi-tarîkıˈl-istiğlâl iştirâ ve teslîm ettikden sonra yine vasî-i mezbûr Habib Bey çiftlik-i mezkûru ba‘deˈt-tahliyetiˈş-şer‘iye veˈt-takābuziˈl-mer‘î târih-i kitâbdan üç yüz altmış gün tamamına değin otuz guruş ücretle müvekkilem mezbûreye îcâr ve teslîm ol dahi ba‘deˈl-istîcâr veˈt-tesellüm çiftlik-i mezbûrun derkine ve ücret-i lâzımesine tarafeyden emr u kabûlü hâviye kefâlet-i sahîha-i şer‘iye ile kefîl oldum dedikde gıbbeˈt-tasdîkiˈl-mu‘teber vekîl-i mezbûr vasî-i merkūm Habibˈin mahzarında ikrâr ve takrîr-i kelâm edip müvekkilem mezbûre semeni vekîli ve âharı tevkîle bana izin vermek ile eğer meblağ-ı bâkī-i mezbûru ve ücret-i mezbûreyi müvekkilem merkūme ecl-i mezbûr tamamında edâ etmezsem çiftlik-i mezbûru âhara bey‘ ve semeninden deyn-i mezbûru kableˈl-istifâ fazla kalırsa müvekkileme îsâl vasî-i mezbûr Habib Bey azl ve ini‘zâlden masûn vekâlete-i devriye vekîle nasb ve ta‘yîn eyledim dedikde ol dahi kabûl ve merâsimini edâya ta‘ahhüd etmeğin mâ vaka‘a biˈt-taleb ketb olundu. Fiˈl-hâmis-i aşer min-Cumâdelûlâ li-sene hamse ve semânîn ve elf. Şuhûdüˈl-hâl: Yusuf Haseki el-mübâşir, Abdullah Efendi b. Abbas el-imâm, el-Hâc Emrullah Çelebi b. Derviş, Zülfikar Ağa b. Abdullah, Ömer Çelebi b. Osman, Hüseyin Bey b. Mahmud, Kadri Beşe b. Maden, Hasan Hoca b. Hüseyin, Davud Beşe b. Maden, Bilal b. Abdullah