Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 811 Hüküm no: 606 Orijinal metin no: [138a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin terekesinden varislerindenArzi’ye intikal eden bağın satış ve kiralanması için Habib Bey’in vekil tayin edildiği Mahmiye-i Galata a‘mâlinden kasaba-i İstinye nâhiyesine tâbi‘ Sarıyar nâm karyede sâkine Muammere bt. Abdullah nâm hatun meclis-i şer‘-i hatîrde mahmiye-i İstanbulˈda Kaliçeci Hasan mahallesinde sâkin iken bundan akdem vefât eden el-Hâc Mustafa b. İbrahimˈin sagīre kızı Arziˈnin tesviye-i emrine kıbel-i şerî‘at-i mergūbeden mansûb vasîsi olan işbu râfi‘üˈr-rakīm Habib Bey b. Veli mahzarında ikrâr ve takrîr-i kelâm edip karye-i mezbûrede vâki‘ iki tarafdan İsak Çelebi mülküne ve bir tarafdan Sunullah mülküne ve bir tarafdan tarîk-i âmma müntehî fevkānî ve tahtânî iki beyti ve bi’r-i mâ’î ve havluyu müştemil mülk menzilim ile karye-i mezbûre bağlarından dâhil-i Zekeriya yolunda vâki‘ bir tarafdan Nikola bağı ve bir tarafdan aceze bağı ve bir tarafdan Nikola Ohan bağı ve bir tarafdan tarîk-i âm ile mahdûd bir kıt‘a bağı vasî-i mezbûr Habib Beyˈe üç yüz kıt‘a esedî guruşa bey‘ ve teslîm ol dahi mal-ı sagīre ile bi-tarîkıˈl-istiğlâl iştirâ ve teslîm ettikden sonra semeni olan meblağ-ı mezbûru vasî-i merkūm yedinden kabz ettikden sonra yine vasî-i mezbûr Habib Bey menzil-i mezbûru ba‘deˈt-tahlîye veˈt-takābuz ve bağ-ı mezbûru târih-i kitâbdan üç yüz altmış gün tamamına değin kırk esedî guruş üzre iken biˈl-vesâye bana îcâr ve teslîm ve ben dahi ba‘deˈl-istîcâr menzil-i mezbûr ve bağ-ı mezkûrun derklerine ve ücret-i lâzımelerine karye-i mezbûreden el-Hâc Emrullah Çelebi b. Derviş nâm kimesne tarafından emr u kabûlü hâviye kefâlet-i sahîha ile kefîl oldum dedikden sonra gıbbeˈt-tasdîk merkūme Muammere vasî-i mezbûr Habib Bey mahzarında ikrâr ve i‘âde-i kelâm edip bâkī meblağ-ı mezbûr ile ücret-i mezkûreyi ecl-i mezbûr tamamında vasî-i mezbûra edâ etmezsem menzil-i mezbûr ile bağ-ı mezkûru semen-i misline âhara bey‘ ve semenlerinden meblağ-ı mezbûr ile ücret-i merkūmeyi istifâ ettikden sonra fazla kalırsa bana îsâle tarafeynden azl ve in‘izâlden masûne vekâlet-i devriye ile vekîl nasb ta‘yîn eyledim dedikde ol dahi kabûl ve hizmet-i lâzımesini edâya müte‘ahhid olmağın mâ vaka‘a biˈt-taleb ketb olundu. Fiˈl-hâmis-i aşer min-Cumâdelûlâ li-sene hamse ve semânîn ve elf. Şuhûdüˈl-hâl: es-Sâbıkūn