Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 816 Hüküm no: 612 Orijinal metin no: [139a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un, kocası Musa Reis ile oğlu Mustafa’ın vekili olduğu ve Usta Sefer’deki alacaklarını vekaleti hasebiyle talep ettiği Mahmiye-i Galataˈda Yolcuoğlu mahallesinde sâkine iken işbu bâ‘isetüˈl-vesîka Havva Hatun bt. el-Hâc Abdülbaki meclis-i şer‘de Usta Sefer b. Osman üzerine da‘vâ ve takrîr-i kelâm edip işbu sene-i mübârekede hacca giden zevcim Musa Reis b. Receb ile oğlum Mustafa hâcc-ı şerîfe giderken zimem-i nâsda olan mallarını da‘vâ ve taleb ve ahz u kabza taraflarından beni vekîl ve Müslimînˈi işhâd etmeleri ile hâlâ zevcim mezbûrun merkūm Usta Sefer zimmetinde bi-tarîkıˈl-karz üç yüz akçe ve oğlum mezbûrun iki yüz akçe hakları olmağla hâlâ biˈl-vekâle mezbûr Usta Seferˈden meblağ-ı mezbûrunu taleb ederim suâl olunsun dedikde gıbbeˈs-suâl mezbûr Sefer cevâbında fiˈl-hakīka mezbûr Musa Reis ile oğlu merkūm Mustafa mezbûrîne deynim vardır deyü ikrâr lâkin mezbûre Havvaˈnın vekâletini inkâr edicek mezbûre Havvaˈdan vekâletlerine beyyine taleb olundukda udûl-ı Müslimînˈden Mehmed Beşe b. Abdullah ve Hüseyin b. Mehmed li-ecliˈş-şehâde meclis-i şer‘a hâzırân olup mezbûre Havvaˈyı huzûrumuzda vekîl eylediklerinde ol dahi kabûl eyledi biz bu husûsa şâhidleriz şehâdet dahi ederiz deyü her biri edâ-i şehâdet eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-hâmis veˈl-işrîn min-Cumâdelûlâ li-sene hamse ve semânîn ve elf. Şuhûdüˈl-hâl: RamazanReis b. Mehmed, Hasan Çelebi b. Süleyman, Musa b. Şa‘bân, Rasûl b. Gülâbî, Ömer Efendi b. Ali, İsa b. Halil, Hüseyin Çelebi b. Ali, Ahmed Beşe b. Osman