Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 819 Hüküm no: 614 Orijinal metin no: [139b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin, merhume Hatice bt. Bîzebân’ın terekesinden üçte birinin techiz, tekfin ve hayır işlerine harcaması için vekil tayin edildiği Mahrûse-i Galata a‘mâlinden İstinyeˈde vâki‘ Kürkçübaşı mahallesi sükkânından bâ‘is-i hâzeˈl-kitâb Mustafa Çelebi b. ( ) nâm kimesne meclis-i şer‘-i hatîr-i lâzımüˈt-tevkīrde yine mahalle-i mezbûre sâkinelerinden iken bundan akdem vefât eden Hadîce bt. Bîzebân nâm hatunun zevci olup biˈl-verâse terekesine vâzi‘uˈl-yed olan Halil Çelebi mahzarında üzerine da‘vâ ve takrîr-i kelâm edip mezbûre Hadîce hâl-i hayatında cemî‘ kelimâtı nâfize olduğu hâlde bi-emrillâh-i te‘âlâ vefâtımdan sonra cemî‘ mâlımın sülüsü ifrâz olunup techîz ve tekfînime ve ıskāt-ı salâtıma ve eyyâm-ı mu‘tâdede tabh-ı ta‘âm olunup it‘âm-ı fukarâya sarf oluna deyü vasiyyet ve tenfîzine beni vasî nasb ve ihtiyâr edip ben dahi vesâyet-i mezbûreyi kabûl eylediğimden sonra merkūme Hadîce musırraten aleyhâ vefât etmekle ben dahi vesâyet-i mahkiyem hasebiyle cemî‘ mâlımın sülüsünü ifrâz murâd eylediğimde zevc-i mezbûr Halil Çelebi mâni‘ olur suâl olunsun dedikde gıbbeˈs-suâl mezbûr Halil Çelebi vesâyet-i mezbûreyi inkâr edicek müdde‘î-i mezbûrda da‘vâsına beyyine taleb olundukda udûl-ı Müslimînˈden ve sikāt-ı muvahhidînden Mehmed Çelebi b. Rıdvan ve İsmail Çelebi b. Mehmed li-ecliˈş-şehâde meclis-i şer‘a hâzırân olup eserüˈl-istişhâd fiˈl-hakīka mezbûr Hadîce Hatun hâl-i hayatında bi-emrillâh-i te‘âlâ vefâtımdan sonra cemî‘ mâlımın sülüsü ifrâz olunup techîz ve tekfînime ve ıskāt-ı salâtıma ve eyyâm-ı mu‘tâdede tabh-ı ta‘âm olunup it‘âm-ı fukarâ oluna deyü vasiyyet ve tenfîzine müdde‘î-i mezbûr Mustafa Çelebiˈyi vasî nasb ve ihtiyâr ol dahi kabûl eylediğinden sonra mezbûre Hadîce musırraten aleyhâ vefât eyledi biz bu husûsa şâhidiz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle olmağın mûcebiyle hükmolunup mâ vaka‘a biˈt-taleb ketb olundu. Fiˈl-yevmiˈr-râbi‘-i aşer min-Cumâdelûlâ li-sene hamse ve semânîn ve elf. Şuhûdüˈl-hâl: Osman Çelebi b. el-Hâc Yusuf, Mehmed Bey b. Mustafa, Hüseyin Çelebi b. Ali, Ahmed Beşe b. Gazanfer