Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 830 Hüküm no: 623 Orijinal metin no: [141a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Abdullah’ın, Osman Ağa b. Ahmed’in azatlı cariyesi olduğundan varislerin kölelik iddialarının reddedildiği İşbu orta boylu, açık kaşlı, elâ gözlü, Rusiyyetüˈl-asl bâ‘isetüˈl-kitâb Afife bt. Abdullah meclis-i şer‘de mahmiye-i Galata hâricinde Müeyyedzâde mahallesinde sâkin iken İnebolu iskelesinde misâfir iken bundan akdem vefât eden Osman Ağa b. Ahmedˈin verâseti zevce-i metrûkesi Hediye Hatun bt. Abdülbaki ile kebîr oğulları İsmail Çelebi ve Mehmed Çelebiˈye ve sagīr oğulları Ahmed ve Mustafaˈya ve kebîre kızları Hadîce ve Âbide ve Meryemˈe münhasıra olduğu şer‘an zâhir oldukdan sonra müteveffâ-yı mezbûrun terekesine vâzi‘atüˈl-yed olup sıgār-ı mezkûrînin vasî-i şer‘îleri ve vâlideleri olan mezbûr Hediyeˈnin vekîl-i müsecceli olan li-ebeveyn karındaşı Mehmed Çelebi mahzarında üzerine da‘vâ ve takrîr-i kelâm edip ben müteveffâ-yı mezbûrun câriye-i memlûkesi olup mülkünde olduğum hâlde beni hasbeten lillâh-i te‘âlâ tahrîr ve i‘tâk etmişken hâlâ vekîl-i mezbûr bana rık olmak üzere vaz‘-ı yed murâd eder suâl olunup sebîlim tahliye olunması murâdımdır dedikde gıbbeˈs-suâl veˈl-inkâr ve ba‘de talebiˈl-beyyine udûl-ı ricâlden Mehmed Efendi b. Mustafa ve Ali Ağa b. Şa‘bân li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr câriyesi merkūmeyi bizim huzûrumuzda tahrîr ve i‘tâk eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-âşir min-Cumâdelâhire li-sene hamse ve semânîn ve elf. Şuhûdüˈl-hâl: Mustafa Efendi b. İbrahim el-imâm, Ali Çelebi b. Mehmed Efendi, Mehmed Bey b. Abdullah, Osman Beşe b. Ahmed, el-Hâc Hasan Beşe b. Abdullah, el-Hâc Mustafa b. İbrahim, Hüseyin Çelebi b. Ali, Ali Bey b. Halil, Hüseyin Çelebi b. Ali