Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 775 Hüküm no: 1011 Orijinal metin no: [120a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Receb’in, İbrahim Bey b. Hüseyin’den satın aldığı câriyenin âzatlı olduğunun ispatıyla parasını geri aldığı Mahrûse-i Bursa’da Alaca Mescid mahallesinde sâkin fahrü’l-müderrisîn bâ‘isü’l-kitâb Mehmed Efendi b. Receb nâm kimesne tarafından husûs-ı âti’l-beyâna vekîl olduğu Hacı Muharrem b. Hasan ve Hacı Ahmed b. Bayram nâm kimesneler şehâdetleriyle şer‘an sâbit olan Ahmed b. Hüseyin nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de esirci tâifesinden İbrahim Bey b. Hüseyin nâm kimesne mahzarında üzerine da‘vâ ve takrîr-i kelâm edip mezbûr İbrahim Bey bundan akdem orta boylu, açık kaşlı, elâ gözlü Rûsiyyetü’l-asl Gülbûy nâm câriyeyi rıkkıyyetini mu‘terife olduğu hâlde mülkü olmak üzre müvekkilim mûmâ-ileyh Mehmed Efendi’ye yüz üç kıt‘a esedî guruşa bey‘ ve teslîm ve kabz-ı semen edip müvekkilim mûmâ-ileyh Mehmed Efendi dahi ba‘de’l-iştirâ ve’t-tesellüm yüz guruş semen-i makbûza el-Hâc Ahmed b. el-Hâc Emir nâm kimesneye bey‘ ve teslîm edip mezbûr el-Hâc Ahmed dahi semen-i ma‘lûm-ı makbûza el-Hâc Ali nâm kimesneye bey‘ ve teslîm edip mezbûr el-Hâc Ali dahi iştirâ ve tesellüm ettiğinden sonra mevsûfe-i mezbûre müvekkilime bey‘ olunmazdan mukaddem mahmiye-i İstanbul’da Sarı Bayezid mahallesinde sâkin iken vefât eden es-Seyyid Ali Çelebi b. Receb nâm kimesnenin ümm-i veledi olup vefâtıyla âzâd olduğunu mezbûr el-Hâc Ali muvâcehesinde mahmiye-i mezbûrda Mahmud Paşa mahkemesi’nde nâibü’ş-şer‘ olan Abdurrahman Efendi b. Sâlih huzûrunda vech-i şer‘î üzre da‘vâ ve müdde‘âsını şuhûd-ı udûl ile muvâcehesinde isbât edip hürriyetine hükm olundukdan sonra merkūm el-Hâc Ali merkūm el-Hâc Ahmed’e ve merkūm el-Hâc Ahmed dahi müvekkilim mûmâ-ileyh Mehmed Efendi’ye mürâca‘at edip her biri verdiği semeni bâyi‘inden ahz etmekle suâl olunup müvekkilim mezbûr Mehmed Efendi’den semen deyû aldığı yüz üç esedî guruşu bana edâ ve teslîme mezbûr İbrahim Bey’e tenbîh olunmak matlûbumdur dedikde, gıbbe’s-suâl mezbûr İbrahim Bey kaziyye minvâl-i muharrer üzre olup mevsûfe-i mezbûreyi yüz üç esedî guruş semen-i makbûza müvekkil-i mezbûra bey‘ ve teslîm ettiğinden sonra vech-i muharrer üzre hürriyeti sâbite olduğu ikrâr etmeğin mûcebince semen-i mezbûr yüz üç esedî guruşu müdde‘î-i mezbûra edâya merkūm İbrahim Bey’e tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ, İbrahim Çelebi b. Ahmed, Mustafa Çelebi b. Ahmed, çukadâr Hasan b. Abdullah, Veli Bey b. ( ).